uMthunywa
YiNtatheli kaMthunywa
La yiwo amazwi kaWeekly Mwale oseqeqetsha ithimu yeHwange Ladies. UMwale ukholelwa ukuthi inguqu yamantombazana kuleli ayisekelwa ngokupheleleyo.
UMwale uthe uzwa ubuhlungu ekuthini amaqembu eligi ephakemeyo yamantombazana asefuna ukutshiyana lenguqu ngoba akulamali.
Lokhu akuqalisi ngoba kumasizini adluleyo, asemanengi amathimu akubona kungelancedo ukuthi aqhubekele phambili edlala.
Ngaphandle kwamathimu asekhalala umdlalo, kulenkokheli esezitshayane lokukhuza inguqu le njalo. UTrust Kwembeya umaqhuzu we-In Line Academy ngomunye wenkokheli eseziphosele amagojwe phansi.
UKwembeya wayesephethe isikhundla sokuba ngunobhala wenhlanganiso yeZimbabwe Women Football.
“Ngaphandle kokuthi siphosele imali njengalokhu okwenziwa kumaqembu abafana, angiboni isizatho sokuthi siqhubeke sidlalisa abantwabethu. Imali yiyo esekela ithalenta phela.”
UMwale wadlala kuqembu leHwange kusukela ngo-1981 kusiya kubo 1987.
UMwale uvezele iphephandaba likazulu ukuba ithimu yakhe yeHwange izakuya khatshana njengoba kwabanguye owalikhokhela laze lafinyelela kuligi ephakemeyo.
“Ngisuke khatshana leqembu lamantombazana alapha eHwange njalo ngomnyaka ka2012 yikho esingene khona kuPSL. Amankazana ethu enza kuhle sibili njalo inkampani yeHwange yiyo esincedisayo ngosekelo lwemali.
“Lonyaka sikhangelele ukuthi siyefinyelela inkezo ngoba sesiqalisile ukulolongela iPSL ezaqala ngenyanga kaNhlangula,” kutsho uMwale.
UMwale uveze ukuthi amantombazana akuqembu leli avela kumaqembu ehlukeneyo adlala kuDivision 1.
“Amantombazana amanengi avela endaweni ezifana laboVictoria Falls lakhonapha eHwange njalo ngiqeqetsha leqembu leNetball laseHwange,” kuqhuba uMwale.
UMwale usuka khatshana kwezenguqu, ngomnyaka ka1977 kusiya ku1980 wayebambela iqembu leHippo Valley.
Ngomnyaka ka1981 kusiya ku-1987 yikho lapho asuka khona esesiyabambela iqembu leHwange.
Ngomnyaka ka2001 uMwale ubeqeqetsha iNational team yabafana benguqu ama-Under-17 kanye lama Under-20.
Nguye njalo owayencedisana lo Wieslaw Grabowski owayeqeqetsha iqembu lama-Under-20 ngomnyaka ophelileyo.
