Amalungiselelo amaYouth Games aseqalisile

Amalungiselelo amaYouth Games aseqalisile

0 107

Thokozile Mbedzi

INGCITSHI zemidlalo etshiyeneyo ezivela ezabelweni ezehlukeneyo zizadibana lonyaka edolobheni leGweru kulandela ukuvezwa ukuba lonyaka imidlalo le izaqhutshwa kulelidolobho.

Imidlalo le ikhangelelwe ukuqhutshwa ibe ngamahlandla amabili, elakuqala lizadlalwa kusukela mhlaka 28 Ntulikazi kusiya kumhlaka 2 Ncwabakazi kukanti ihlandla lesibili lizaqhutshwa kusukela mhlaka 4 Ncwabakazi kusiya ku-10 Ncwabakazi.

Abadlali kanye lababukeli bazadibana kumqhudelwano wamaYouth Games njalo lonyaka lanxa lumkhosi ungasenziwanga nyakenye kulandela ukuqhamuka komkhuhlane wekholera.

Kubikwa imidlalo le izabuthanisa abadlali abanengi kunye lalabo abakhubazekileyo abazancintisana kumidlalo efana le-basketball, ukugijima, i-handball, ibhola lokuqaga, inguqu yabafana lamankazana, le-volleyball.

Ekhuluma lentatheli kaMthunywa omele ezemidlalo eNkabazwe umaqhuzu wezemidlalo  uMuvirimi Chivivi uveze ukuthi balokujabula okukhulu ngokuba baphinde njalo bathola ithuba lokuba baphatheke ekuqondiseni imidlalo le.

“Siyajabula kakhulu ngokuthola ithuba lokubana imidlalo yezabelo zonke ezilitshumi izodlalelwa edolobheni lethu. 

“Emidlalweni le sijonge ukuba abadlali bengabi zintshatshu kuphela kodwa sifuna lokubumba izimilo zabantwana bonke ngendlela ehambelana leminyaka yabo ukuze bathole okuzenza bakhule belobungcitshi empilweni zabo,” kutsho uChivivi.

“Imfundiso esizayipha abadlali laba izabe ihambelana leminyaka yabo, endaweni yokuthi bafundiswe behlangene. Asifuni ukuthi lo ole-13 athole imfundiso yebanga lalowo oseleminyaka engu-17.”

Uqhubekele phambili njalo esithi abadlali laba indawo zabo zokuhlala zilungiswe ngendlela elobunono obuphezulu njalo bazalala emibhedeni hatshi ukuba balale phansi,  bathole lokudla okuhlanzekileyo.

“Sikhangelele ukuba abadlali laba baveze ubungcitshi obusezingeni laphezulu obuzaphakamisa ifulegi yelizwe lanxa sebeqhubekela phambili hatshi ukudlala nje okungela ikusasa labadlali.

“Imidlalo esikhangelele ukuba izadlalwa ngebalisela i-basketball, ukugijima, i-handball, netball, inguqu yabafana lamankazana, le-volleyball.

“Bonke abazamela izabelo bazakwamukela imbiko ngokumiswa kwemidlalo kuseselesikhathi ukuze benze amalungiselelo afaneleyo,” kuphetha uChivivi.

SIMILAR ARTICLES

NO COMMENTS

Leave a Reply