uMthunywa
YiNtatheli kaMthunywa
INYATHELO lokuthi abadlali benguqu baphiwe imali yomhlalaphansi (pentsheni) nxa sebetshiye inguqu kubikwa selithakazelelwe ngabadlali abanengi kumaligi wonke akuleli, kutsho inhlanganiso yeFootballers Union of Zimbabwe.
IFUZ ngomnyaka odluleyo yaveza ukuba izakhulumisana lamaqembu ngemva kokunanzelela ukuthi abadlali basuka bahawule kakhulu ngokuswela imali nxa sebethethe umhlalaphansi.
Kujwayelekile ukuthi inengi labadlali liyaphelelwa ngamacebo okuziphilisa ikakhulu nxa selifikise iminyaka yokuthi alisenelisi ukulikhaba ibhola.
Unobhala jikelele weFUZ uPaul Gundani ubike ukuba benza umhlangano lamathimu wonke enguqu kuleli, kwavunyelwana ukuthi kuqalwe ukukhitshwa imali ezagcinwa njengepentsheni yabadlali.
“Sacela ukuthi sisungule uhlelo lwepentsheni lolu ngoba sesibonile ukuthi impilo zabadlali yenguqu ibalukhuni nxa sebekhulile eminyakeni. Kuyaziwa ukuthi umuntu angeke adlale inguqu impilo yakhe yonke, ngakho ipentsheni le sifuna igcine abadlali.
“Eminye imisebenzi ilamapentsheni, pho yini engasehlula kunguqu?”
UMthunywa uzwe ukuba amanye amaqembu kuligi yeCastle alokhe edonsela muva ngokungena kuhlelo lwepentsheni.
UGundani uthe basakhankasa kumathimu la njalo bakhulumisana labadlali ukuze bakhuthaze amaqembu abo.
Okwamanje amaqembu aseqalisile ukubhadala yiDynamos, FC Platinum, ZPC Kariba leChicken Inn.
“Sizakhulumisana lamaqembu onke. Khathesi iDynamos, FC Platinum, ZPC Kariba leChicken Inn yizo eseziqalile ukukhipha imali yepentsheni yabadlali babo.”
