uMthunywa
YiNtatheli kaMthunywa
UMONGAMELI welizwe uKhomuredi Robert Gabriel Mugabe useveze ukuthi uHulumende uzahlolisisa izifundo ezenziwa ezikolo ngenhloso yokuthi bahlonyiswe ukuze bangaqeda bangakhangeleli ukuthi baqhatshwe kodwa bazisebenze.
UMongameli ukhulume lokhu ngoMgqibelo odluleyo eseFolosi lapho obekulomkhosi wokuthakazela umkhosi we21st February Movement.
Ukuchwayisisa kutsha izifundo ezenziwa ngabatsha kuzaphathisa ukuthi kugcwaliswe inhloso yokuthi kufundiswe abantu abazaziqhatsha hatshi abafuna ukusebenzela abeLungu.
UMongameli welizwe uthe inhloso kaHulumende le yiyo eyenza banquma ukuthi kube lomnyango we-psychomotor skills. Lo kungumnyango obona ngokufundela imisebenzi yezandla etshiyeneyo.
“Sikhangelele ukuthi kuzigaba zonke kube lamakolitshi afundisa imisebenzi yezandla (Vocational Training Centres) ukuze abatsha bathuthukise ubungcitshi babo.
“Kungakho-ke umnyango we-pschomotor skills yiwo ozaphathisa ukuthi abatsha batholiswe amandla okuzithuthukisa.
“Kukhangelelwe njalo ukuthi bathuthukise lobungcitshi babo,” kutsho uMongameli.
Uqhubekele phambili wathi lokhu kwanqunywa ngemva kokunanzelela ukuthi abantwana balezipho ezehlukeneyo; abanye baphiwe ezifundweni kuthi abanye baphiwe emisebenzini yezandla.
“Kwezemfundo ngithemba sesizamile impela yikho nje sikhokhela eAfrica.
“NjengoHulumende siphakathi kokuloba ugwalo lweNational Sports Policy oluzaphathisa intsha ezingcitshi kwezemidlalo,” kuchaza uMongameli.
Uphethe ngokucebisa abatsha ukuthi bazinikele ezifundweni zabo njalo bafundele imisebenzi yezandla efana lokwakha, ukulima kanye lokubaza.
