uMthunywa
YiNtatheli kaMthunywa
USEPP Blatter, obesevotelwe ukuba ngumongameli weFifa njalo, utshiye isikhundla sakhe ngoLwesibili ngemva kwamalanga amane evotelwe.
Ngokutshiya kwakhe, uBlatter usezifake emehlweni amapholisa eMelika, iFBI ebika ukuthi iphezu kokuchwayisisa umkhokheli lo kumacala obugwelegwele.
Ngokukhitshwa kombiko wakhe, amaphephandaba amanengi umhlaba wonke alobe ukuthi uBlatter wethuswe yibufakazi obuveza ukuthi wakhokhela ubungilimbane kuFifa.
Utshiya kanje inhlanganiso yeFifa iphakathi kwenkemenkeme yokubotshwa kwezisebenzi zayo eziyisikhombisa ezetheswa icala lobugwelegwele.
NgoLwesithathu ekuseni, ilunga leFifa executive committee uKozo Tashima uthe kuyamangalisa ukuthi uBlatter utshiye isikhundla.
“Esevotelwe, uSepp Blatter wayekhuluma okunengi ngamacebo akhe okuvusa inhlanganiso yeFifa. Wayekhanya ethabile ukuthi uvotelwe kakutsha.
“Okunengi ngoBlatter ngamahungahunga, kodwa nxa kukhona okumenze watshiya umsebenzi, kumele achaze. Akumelanga atshiye izinto zonakele kangaka kuFifa. Angiboni isizatho sokuthi atshiye.”
Iphephandaba leNew York Times lithe laye uphakathi kwalinsindabaphenduli yokutshontshwa kwemali lokudiziswa kwamazwe okumele abambe umkhosi weWorld Cup okweminyaka eminengi.
“Kumizamo yabo yokugcwalisa ubufakazi obuzabambisa uBlatter, amalunga abacubunguli becala leFifa abaseMelika bakholwa ukuthi uBlatter ulesandla,” kutsho i-New York Times
