Hwatshu idlalade lesi 18. . . Iqina isiyaphambili iMlambos Express Band

Hwatshu idlalade lesi 18. . . Iqina isiyaphambili iMlambos Express Band

0 111
uFiselani Ngwenya

Cornelius Luphahla
IGULA elidala livame ukubuka amasi, lesisaga sigcwaliseka ngesenzo esenziwa liqembu leMlambos Express Band nanko phela liqhubekela phambili ngokujabulisa uzulu selize lilamadlalade angu-18.

Leliqembu eliholwa nguFiselani Ngwenya lihwatshe idlalade lokucina mhlaka 4 Mpalakazi eCosmos City kweleSouth Africa ngenjongo yokujabulisa uzulu ngekhefu leKhisimusi.

UMthunywa uxhumane loMqondisi waleliqembu uThabani Ndlovu wachaza ngalelidlalade ethi basazolikhipha njalo ngokusemthethweni kweleZimbabwe.

“Idlalade lethu leli esilikhiphileyo lilesihloko esithi Plan B njalo ngelesi 18. Sesakhipha emadlalade angu-16 kanye lama-DVD amabili. Ngalokhu lelidlalade lijonge ukujabulisa uzulu njengoba ikhefu leKhisimusi selisondele.

“Sizavakatshela kweleZimbabwe mhlaka 16 kuyonale inyanga lapho esizajabulisa khona abantu eBhagane ngemva komdlalo weqembu leBosso ozabe ulapho. Lapha sizadlala kusukisela ntambama kuze kuyelamula ukuphuma kwelanga. Kuzathi mhlaka 17 sikhiphe idlalade lethu leli ngokusemthethweni eDummz Stadium ePlumtree,” kutsho uThabani Ndlovu.

UNgwenya onguye oqondisa iqembu leli uthe ubonga uzulu njalo umthembisa ukumvakatshela endaweni ezehlukeneyo koMthwakazi wabuya wathi kumnyaka ozayo uzabe ehlala kuleli.

“Mina ngiyajabula kakhulu ngosekelo engiluthola kuzulu ngakho ngithembisa ukuvakatshela endaweni ezehlukeneyo ngisenza ama-shows ukuze abantu bonke bawuthole umculo wami. Okunye njalo kumnyaka ozayo ngizabe ngiphila kakhulu kwelakithi ngoba sesiside isikhathi ngingahlali khona.

“Ngizakwenza lokhu ngenjongo yokujabulisa abantu bakithi kanye lokufundisa uzulu ngezinto ezenzakala empilweni ngoba ingoma zami ziyafundisa,” kuphetha uFiselani Ngwenya.

NO COMMENTS

Leave a Reply