uMthunywa
Gladmore Ncube
KUMISWE imidlalo yenqindi ebiseSizinda South Beer garden ebhawa yePumula ngemva kokufa kwenye indoda ngesikhathi ibukele imidlalo le ngempelaviki.
IZimbabwe Boxing Federal (ZBF) National Championship imiswe ingakapheli kulandela ukufa kukaMungani Mathe (60) okubikwa ukuba wabulawa ngumkhuhlane wetshukela ngesikhathi ebukele i-boxing.
Kulandela ukufa kukaMathe, inhlanganiso yeZBF iyedlulisele umncintiswano wayo. Kubikwa uzaqhubeka mhlaka 25 kuLwezi.
Intatheli ikhulumisane lomnikazi weSizinda South Beer Garden uDonald Ndebele ongumngcini ngcebo weqembu leHighlanders othe imidlalo ibihlelwe kuhle kodwa iphazamiswe yikufa kukaMathe.
Uthe okwenzakaleyo kufanana lokuthi kwavela umnyama wempisi emncintiswaneni njalo uMathe ubengumthengi wakhe omkhulu.
“Imidlalo ibimnandi kakhulu kodwa uMdali uyabe sekukhethile yikho akulamuntu wenyama ongakuntshintsha lokho. UMathe ubengumuntu onathela kule indawo phose nsukuzonke kodwa ilanga nxa selifikile liyabe selifikile.
Ngemva kokwenzakala kwesiga lesi umqondisi omkhulu we-ZBF uSteven Masiyambumbi wabika ukuthi imidlalo isiyedluliselwe phambili.
“Imidlalo ebisisele izadlalwa mhlaka 25 kuyonale inyanga kaLwezi. Imidlalo yethu ibiqhuba kuhle kakhulu abafana bebhuqana sibili bengadlali kodwa nxa sekuthe kwafa umuntu kumele sitshengise ubuntu bethu njengabansundu sihloniphe odlulileyo,” kuchaza Masiyambumbi.
Uqhubekele phambili uMasiyambumbi wathi kule imidlalo ebikhona ngempelaviki bekulabadlali abavela ezabelweni ezilitshumi ilizwe lonke.
“Umncintiswano lo ubuyenzelwe abadlali abazimiseleyo ngoba bekudibane intshantshu ezivela endaweni ezitshiyeneyo kwelakithi kugoqela konke labadlali abavela ebuthweni iZimbabwe National army.
“Abadlali ababekhona kulo umqhudelwano babesedlula i110. Phezu kwalabo bekwengezwe ngabadlali abancane abangu16 labo bedabulana ngenqindi kungadlawa.
