uMthunywa
YiNtatheli kaMthunywa
UMDLALO wokudubula koBulawayo usulandelwa luzhizhi lwabantu nanko phela amalunga enhlanganiso yeBulawayo Executive Interaction Initiative aseqoqe umncintiswano wokudubula ozaqhutshwa kulimpelaviki.
Imncintiswano yokuphathwa kwembobho yandise ukudlalwa ngamalunga amabutho kodwa ngenxa yokuthandwa ngumphakathi, ibutho lakuleli lakubona kufanele ukuthi kunxuswe lozulu.
Kumbiko othunyelwe iphephandaba likazulu ngumgcinisihlalo weEII, uJabulani Nkomo, umncintiswano obizelwe uzulu uzaqhutshwa ngoMgqibelo egcekeni lenkamba yamabutho esizwe eseMbizo.
UNkomo wazise ukuba banxuse labo abazi ukubamba uvolovolo. Imhlobo yembobho ezasetshenziswa kubikwa ibalisa AK47, ipistol laleyo eduma phezulu. Kulumncintiswano kuzabuthaniswa amaqembu abantu abayisitshiya galolunye lapho ithimu ngethimu ezaphiwa imbobho yokuthi idubule amazenge aphanyekwe kumango othile enkundleni.
“Ugatsha lweBulawayo Executive Interaction luthanda ukunxusa bonke abalobungcitshi kwezokubanjwa kombobho ukuthi baze ngobunengi babo kumncintiswano wethu ozabe useMbizo.
“Inhloso yethu yikuthi sivuselele ukubambana komphakathi lamalunga ebutho sesizwe. Umncintiswano lo ngowemuli yonke ngakho abazali bakhululekile ukuthi baze labantwababo.
Kumbiko wakhe, umqoqi omkhulu wemncintiswano le ngaphansi kwe-EII uBrian Mureverwi uthe abantu bengethuki ukuzophatheka kulomncintiswano ngoba ukudubula konke kuzabe kukhangelwe zingcitshi zebutho.
“Abantu bakithi abakhululeke ukuzophatheka lokubukela labo abalolwazi kwezokudubula. Abazali abakhululeke ukuza labantwana ngoba siqoqe inhlelo ezimbalwa zokuthi sikholise siyimuli ezibalisa ukosa, ama-jumping castle lokunengi okuzathandwa ngumuntu wonke.
Kulumncintiswano kuzabuthanisa amaqembu abantu abayisitshiya galolunye lapho ithimu ngethimu ezaphiwa imbobho yokuthi idubule amazenge aphanyekwe kumango othile enkundleni.
UNkomo uthe loba umncintiswano wabo unxusa wonke umuntu, bona njengenhlanganiso enkulu yalumdlalo bafisa ukusebenzelana lozulu ozimisele ukuthanda umdlalo wokudubula ngenhliziyo.
“Labo abafuna ukuthi badlale umdlalo wethu okweqiniso, abazimiseleyo, bakhululekile ukuza kithi bazokuba yingxenye yeqembu le-Ostritch Shooting Club. Iqembu lethu lisebenzisa igceke leMbizo njalo bonke abalesifiso, abaphange bathintane lathi,” kutsho uNkomo.
