uMthunywa
NGITHEMBA liphilile bafundi, selidumela emaphethelweni ikhefu, ziyavulwa kuviki ezayo ngithemba seliphumulile.
Ngeviki edluleyo besixoxa ngezaga lapho obekudingeka ukuthi ukwazi ingcazelo yesaga ukuze wenelise ukudinga isaga esiphikisana laleso osiphiweyo. Nanzi-ke ezinye zempendulo zezaga eziphikisana lalezo oziphiweyo.
1. okwakho ngokudlileyo
2. ukhuni olungaziwayo aluthezwa
3. kwabo kwagwala akulasililo
4. inkala yafuza unina
5. ufela amafufu njengegundwane
6. utshaye ekhaleni
7. inhliziyo idlala lamaphaphu
8. umdlisa imbuya ngoluthi
9. umntwana yindla ngaye
10. yingwe lenja
SIYAQHUBEKA bafundi ngezifundo zethu zolimi lwesiNdebele. Lamhlanje sizafunda ukusebenzisa igama elilodwa elitsho into efanayo njengalapha:
(a) Lamuhla sizakudla umumbu owaphekwa wachaywa. — Ufutho.
(b) Amaxhegu athanda ukudla amathumbu amancane — ……………………..
(c) Landa into yami engigcinela kuyo igwayi lamakhala — ……………………
(d) Ngithengise inkomo engehlisiyo — ……………………………………………….
(e) Ungithengisele umntwana wembuzi. — …………………………………………
(f) Basiphe inyama yenkomo ezifeleyo. — …………………………………………..
(g) Simnandi isitshwala samabele akhitshwe emgodini. — …………………….
(h) Ngihlangane lomuntu oloboya umzimba wonke. — ………………………
(i) Bahlabe inkomo ephiwa unina wentombi enkomeni zamalobolo. — ……………………………………………………..
(j) Ngethuswe yisikhumba esihlutshwa yinyoka. — ……………………………
Bafundi akesime lapha okwalamuhla. Thumelani impendulo zenu kunombolo lezi 0773675473 ngeWhatsApp loba ngeSMS. Ufake ibizo lesibongo sakho, ukuthi ukuliphi ibanga lokuthi ufunda kusiphi isikolo. Thumela njalo lomfanekiso wakho. Kuphephandaba lakuviki ezayo sizafaka impendulo zakho kanye lezithombe zenu.
Nampa abanye abafundi abathumele impendulo zabo kuMthunywa.
