uMthunywa
YiNtatheli kaMthunywa
ISIKOLO seSikhulile High esikoBulawayo sesibizwa ngokuthi siyintshantshu engehlulwayo kumdlalo wokuqaga kulandela ukunqoba kwaso inkezo yeStella edlalelwa yizikolo zonke elizweni.
NgoLwesithathu kube yikudla kwamehlo ngesikhathi ithimu yamankazana le enqobileyo itshengisa inkezo kwabanye abafundi lomphakathi welokitshi le-Lobengula.
ISikhulile High sibe yisikolo sakuqala ukunqoba inkezo yeStella kathathu iminyaka ilandelana.
Iqembu elenze kahle leli liloNobukhosi Ndlovu, Serah Nyoni, Ntando Sibanda, Gabisile Sibanda, ,Sihle Ngulube, Nomagugu Makhalima, Nyarai Sithole, Gladys Makono, Felistus Kangwa, Michelle loNicole Muzanenamo.
Umqeqetshi wabo uConnie Buka ubike ukuba bamanzi nte ngokunqoba kanengi umncintiswano lo.
“Sibonga bonke abasisekelayo ekuqaleni ikakhulu umphathisikolo lababalisi labazali. Isikolo seSikhulile High sisebenze kanzima ukuthi sibe yintshantshu ye-netball. Konke lokhu bekungeke kwenzeke kungela ukuzimisela,” kutsho uBuka.
Kulabadlali balesi isikolo abakhethwe ukuthi babe yingxenye yeqembu lesizwe elikhangelelwe ukuyancintisa kumincintiswano yeConfederation of Secondary School Sports Associations (Cossasa) eLesotho.
Abadlali laba babalisa uMitchell loNicole Muzanenamo loNtando Sibanda.Abanye abadlali nguSelina Kurirevu, Lisa Tanyanyiwa, Manzini Muvembi abesikolo sePamushana High esisesabelweni seMasvingo, uWhitney Manyuchi Mvurwi, Sithembile Manyukire abafunda esikolo seMnene loSibane Munjanji.
