uMthunywa
Yintatheli kaMthunywa
ZIHAMBA zihlome ziphelele ziqonde edolobheni leBindura izikolo ezikumhlubulo ongezansi yelizwe zihlose ukuyancintisa kumqhudelwano omkhulu kumdlalo wenguqu yezikolo kuleli owenkezo yeCopa Coca-Cola kusukela ngoLwesihlanu.
Isabelo sakoBulawayo sifake ithemba kuqembu lesikolo seMpopoma High kumantombazana lakubafana besikolo seLobengula High.
Inhlanhla yokunqoba kulesisabelo ihlezi ikakhulu kumantombazana eMpopoma, okukhanya ayazi ukugiqa ibhola lenguqu.
Kusukela yasungula ngo-1989, izikolo zakulumango welizwe ezanqoba inkezo le yiMzilikazi High yakoBulawayo leMzingwane High eyeMatabeleland South.
Inkezo yeCopa Coca-Cola le isekelwa ngemali yinkampani yeDelta Beverages yamanamunede leCoca-Coca ibambene labaxhasi bayo iMutare Bottling.
Umvuzo wakuqala yi$6 000.
Lonyaka kukhangelelwe ukuthi lezikolo zaseMat North ziqhube ngcono zenelise ukufinyelela isigaba sokucina okwakuqala.
Umsekeli weNational Association of Secondary Heads (Nash) kwezenguqu uArthur Maphosa ubike ukuba umncintiswano walonyaka uzakuba nzima.
“Ngendlela okuqhutshwe ngayo amalungiselelo emidlalo yama-final alonyaka eBindura, ngibona angathi kuzafiwa. Sibonga abasekeli bethu iDelta Beverages, iCoca-Cola leMutare Bottling ngokuqhubeka bencedisa ukukhulisa ithalenta labantwana abadlali inguqu,” kutsho uMaphosa.
UMaphosa, ophinda abengumphathisikolo weGwanda High uthe kuyisifiso sakhe ukuthi lezikolo zaseMat South ziphumelele ukuthwala linkezo.
Izikolo ezizancintisa kuCopa Coca-Cola yalonyaka:
Amantombazana:
Group A: Mwenezi Govt School, Townsend,Vainona;
Group B: Chidyamakono (abanikazi benkezo), Mamunyanyadza, George Chipadza;
Group C: Hermann Gmeiner, Tongwe, Parirewa
Group D: Rushinga, Sodbury, Mat North
Abafana:
Group A: Kundayi, Pfupajena, Oriel Boys
Group B: Lobengula, Rusununguko, Takwirira
Group C: Chipindura, Tohwe, Sabiwa, Group D: Rujeko, Guinea Fowl, Gutu
