uMthunywa
YiNtatheli kaMthunywa
KUBIKWA ukuthi umdlali waphetsheya ongaconsi phansi, uCristiano Ronaldo, ufuna ukubuyela ekhaya lakhe elidala, iManchester United.
Umdlali weReal Madrid lo usefuna ukutshiya eSpain kanti abantu abasondelane lalumdlali bathi i-United iseseduze kakhulu lenhliziyo yakhe.
URonaldo watshiya i-United ukuze ajoyine iMadrid ngesivumelwano se-£80m ngomnyaka ka-2009.
Imbiko ithi i-United izatshintshisana ngonozinti waseSpain, uDavid de Gea, 26, kanye lemali engange-£174m ngaphezulu ukuze bathole uRonaldo.
Kubikwa ukuthi abeluleki balumdlali sebetshelwe ukuthi batholele uRonaldo indlela yokuphuma eSpain, njengoba kubikwa ukuthi udinwe uyaqhuma ukusolwa kwakhe ngokubalekela ukukhokha iTax elinganiselwa ku-£13m yiziphathimandla zaseSpain.
Inkinga ngoRonaldo kukhanya yikuthi mancane kakhulu amaqembu angenelisa iholo lakhe lenyanga zonke ngaphezulu kwemali enkulu yokumthenga.
Kubikwa ukuthi i-PSG ilentshisekelo yokumsayina ngesikhathi abaphathi abatsha be-AC Milan baseChina labo bebelokhu bexhumana lomphathi wezindaba zikaRonaldo, uJorge Mendes.
Kuphinde kube lembiko yokuthi iChelsea layo iyamfuna lumdlali.
Kulokwenzeka futhi ukuthi umdlali lo acine esedlala ku-Chinese Super League.
