uMthunywa
YiNtatheli kaMthunywa
OLESIKHUNDLA esikhulu phakathi kukaCosmas “Tsano” Zulu loAmin Soma Phiri ngubani?
Lo yiwo umbuzo osemilonyeni yabasekeli labalandeli benguqu yeZimbabwe.
Inkokheli zeHighlanders ezikhulume lephephandaba likazulu zibika ukuba umsekeli kamqeqetshi uPhiri nguye ophezulu. UZulu waziwa njengomqeqetshi wabonozinti kuphela.
Amadoda amabili la athola inhlonipho kumdlalo kanobhutshuzwayo, aphenduka abayinhlekisa kulandela ukuxabana kwawo iHighlanders ivela dlala leFC Platinum enkundleni yeMandava edolobheni leZvishavane.
Ukudingisisa kwephephandaba likazulu kuveze ukuthi kukhona okwakufukamelwe nguZulu loPhiri okwenza baxabana.
Ukungezwani kwabo kusukela kudala.
Endaweni yokuthi kucatshangwe icebo lokuvusa iqembu ngemva kokunqotshwa, kwakhethwa ukuthi kuliwe endleleni yokuphenduka koBulawayo. Amaphephandaba agcwele ngalindaba yokulwa kwabaqeqetshi laba.
Insindabaphenduli yindwangu eyakhulunywa nguZulu. Umqeqetshi wabonozinti lo kubikwa wahwatsha amazwi efanisa uPhiri “lendwangu”.
NgeSonto kulandela ukumiswa kwabo umsebenzi, uZulu uhlengezele inyembezi ekhalela umsebenzi wakhe.
Abafakazi abaseduzane lokucazululwa kodaba lolu bathe uZulu loPhiri abezwani kusukela kudala.
“Indaba inkulu njalo inzima ukuxazulula. Amadoda la avele awezwani. Ungabuza abantu abazi imbali yabo bazakutsho ukuthi lokhu abakwenze khathesi ngokuncane.
“Kulihlazo ukuxabana phambili kwabadlali, okuyikhona okudale ukuthi inkokheli zeqembu zibamise umsebenzi.
Okuhluphayo yikuthi kwakhulunywa inhlamba eziyangisayo. Ngokubona kwethu udaba lolu luzaphethwa nzima.
Mhlawumbe omunye wabo engaxotshwa umsebenzi,” kutsho isisebenzi seHighlanders esikhethe ukufihla ibizo laso.
UNhlanhla Bahlangene Dube ongumaqhuzu weHighlanders uthe angeke atsho okunengi mayelana ngamadoda la.
“Okunengi kuzavela kulabo abaphiwe umlandu wokukhangelisisa isisusa sokuxabana kwabo,” nguDube lo ngoLwesibili.
Iphephandaba likazulu lizame ukuxhumana labaqeqetshi laba kwavela ukuthi kunzima ukuba bakhulume lentatheli.
Kumbali yeHighlanders, uZulu loPhiri ngabokuqala ukumiswa umsebenzi ngesizatho esingaphathelani lokudlala kweqembu.
