uMthunywa
YiNtatheli kaMthunywa
INHLANGANISO yeZimbabwe Women Football ibika ukuthi idinga ukusiza amaqembu amatsha kuzo zonke izabelo ngemizamo yokuvuselela ithalenta lamantombazana kumdlalo kanobhutshuzwayo.
Kuhlelo olukhokhelwa nguSamukeliso Silengane umsekeli kamongameli kuZimbabwe Women Football, sekubunjwe amathimu amanengi emaphandleni lakwamanye amadolobho ayengela maqembu enguqu yabomama.
USilengane, owaziwa kakhulu ngokukhankasela amalungelo abadlali abangomama, uthe ngaphansi kohlelo lwabo bazabhoda izigaba zonke zelizwe bekhuthaza umphakathi ukuthi usungule amaqembu.
“Inhlanganiso yeZimbabwe Women Football iqinela ukuthuthukisa umdlalo wenguqu yabomama izwe lonke ngakho silohlelo lokuvusa umdlalo lo ngokuncedisa umphakathi ukuze uthole usizo lokusungula amaqembu. Sifuna ukuthi zonke izigaba zibeleqembu kusiyafika inyanga kaMpalakazi. Okwamanje sesincedise eFilabusi, eGwanda, ePlumtree, eMwenenzi laseNkabazwe.
“Isiqokoqela sethu ngesokuthi sikhulise ithalenta lamantombazana. Siyananzelela ukuba emaphandleni akulamaqembu amanengi kodwa kulethalenta,” kutsho uSilengane.
USilengane uthe ukubone kufanele ukuthi isigaba ngesigaba sibe leligi yaso.
“Silokuthokoza okukhulu ngalokhu esikwenzayo ngoba abantwana abangamankazana bayakukhwabitha ukudlala inguqu.”
Kusenjalo inkokheli zenguqu yabomama kumhlubulo ongezansi yelizwe seziveze ukuba ziphakathi kokukhulumisana labosomabhizimusi abalakho ukusebenzelana labo ngokuphathisa ngemali yokuqalisa iligi.
Lokhu kuza ngemva kokuba linhlanganiso ibike emphakathini ukuthi akula ngitsho lenkampani eyodwa ezimiseleyo ekuthuthukiseni amantombazana kulumdlalo.
