uMthunywa
YiNtatheli kaMthunywa
UPHATHISA Ngwabi odume ngokugijima edolobheni leHwange esabelweni seMatabeleland North uthembisa ukugijimela umvuzo omkhulu enkundleni yeZimbabwe International Trade Fair kumjaho wokugijima umango weCoca-Cola Four-Minute Mile kulimpelaviki.
UNgwabi ogijima emele iqembu leHwange Colliery Athletics ungomunye walabo abazancintisa ukuphutsha umango lo mhla kugijima abangamatshumi amabili, kulumjaho osekelwa yiCoca-Cola incedisana leBulawayo Athletics Board (Bab).
Umjaho lo unxusa labo abalesiqubu sokuqeda ikhilomitha lengxenye ngesikhathi esingaphansi kwemizuzu emine.
Kumaviki amabili adluleyo uNgwabi labanye badlule kumahlandla amanengi wokuhlela abagijimayo eWhite City koBulawayo. Ihlandla lokucina lokudinga intshantshu zesiqubu lenziwe ngeSonto edluleyo.
Inhlanganiso yeBab, ibikele iphephandaba likazulu ukuba ngoLwesihlanu lizakwenza umbuthano wokwehlisa inani labantu abazagijima.
“Abagijimayo bonke bayazi mhlophe ukuthi ngoLwesihlanu sizakuba le-semi final yokukhetha labo abazaphumelela ukuncintisa kuZITF Coca-Cola Four-Minute Mile ngoMgqibelo. Sesilungiselele saphelela ukuthi siqhube umjaho lo,” kubika uManuel Mpofu uMgcinisihlalo we-Bab.
Uqhubeke wathi bafuna ukukhetha abantu abangamatshumi amabili kuphela.
“Sizakwenza ama-semi final la ukuze sikhethe labo abazatshaya intambo ngesikhathi esifitshane. Abazaphumelela ukuqeda umango kuqala abalitshumi yibo abazaphiwa imvuzo.”
Kulumncintiswano kugijima amadoda kuphela njalo ngomnyaka odluleyo owatshaya intambo kuqala kwakunguElijah Mabhunu ogijimela iqembu lamapholisa eFairbridge.
Nampa abadlali abazancintisela ukugijima ku-final ngoLwesihlanu:
Phathisa Ngwabi (Hwange Colliery Athletics), Titus Nyathi (LM Academy), Thando Maphosa (Sparrows), Caliscious Moyo (LM Academy), Ammon Moyo (Sparrows), Trust Chidomaya (ZRP) Dumo Mkhwananzi (Sparrows), Willard Mutasa (HQ1 Brigade), Nyasha Mutsetse (Independent), Levinson Mapfuwa (Black Rhinos), Trust Hove (Black Rhinos), Tendai Zimuto (Black Rhinos), Blessing Whyson (Black Rhinos), Nomore Wikiri (ZPCS), Nyasha Chiuswa (Amen Avademy), Vareri Wellington (Amen Academy), Bornface Jeki (Black Rhinos), Point Chanza (ZPCS), Paul Mhizha (ZPCS), Jonathan Chinyoka (ZPCS), Tapiwa Chineka (Black Rhinos), Blessing Chidziva (ZRP Fairbridge), Elijah Mabhunu (ZRP Fairbridge), Isaac Mpofu (ZRP Fairbridge), Ngonidzashe Ncube (ZRP Fairbridge), Jacob Mugomeri (Zimpost), Vineal Moyo (Blanket Mine).
