uMthunywa
Silo C Dube kugwalo
SIQHUBEKA ngawo umdlalo wethu lo olotshwe ngobunono obukhulu. Umdlalo lo lizavumelana lami bafundi ukuthi ngumdlalo kodwa usitshengisa izinto ezenzakala khathesi lokhu abathi yi(current affairs) ngesiLungu. Ababalisi abahlalisekanga ngoba iholo labo alibasuthisi. Ngesikhathi kulotshwa lumdlalo ilizwe lethu leZimbabwe lalingamanga kuhle kwezomkhonomi. Ezikolo kwasekulamathophu aphu emali zesikolo.
Entweni zonke ezenzakalayo kulabantu abakusekelayo lokho kubekhona njalo abakhononayo ngalokho. Sizwa lapha uSipatalala ekhuluma ngobubi obabuhambelana lamathophu aphu lawo. Kuzinto ababezinikeza esikolo ezinjengabophethulo, uSipatalala uthi bezwa ukuthi banceda uMphathi wesikolo ukuze enze izinhambo zakhe ezingapheliyo elokhu esithi uya emhlanganweni kanti uyathenga izinkomo zokufaka epulazini lakhe elitsha.
Waqhubeka ethi kwesinye isikhathi utholakala ethwele impahla eziyathengiswa esitolo sakhe esisepulazini. Akuyiwa nganxanye kungesimanzi. UNdabeni uyababuza abanye bakhe ukuthi bayamsola yini lowo Mphathi ngesenzo sakhe?
Impendulo kaMaNaba imbaxambili ngoba uzwakala ethi, siyamsola asimsoli. Kacaci ukuthi umi ngakuliphi icele.
Uqhubeka ethi kubi akwenzayo ukusebenzisa imali yezingane ngaleyondlela.
UMaNaba uthi ngelinye iso kufana xathu lokuhlukumeza abantwana. Ngakwelinye icele uMphathi lo wenzenje ngoba uholwa ngumumo welizwe. Uyabuza ukuthi athini? Abulawe ngumhawu inyawo zakhe ziphakathi kwamanzi? Kanti angithi uMlimu unceda ozincedayo? Uqhubekela phambili ethi kubi akwenziyo kodwa ngesimo somkhonomi kuqondile. Inkulumo kaMaNaba le igcwele izinto ezidinga ukuphikiswa.
Kambe sekumele ububi bugqitshelwe ngenxa yomumo welizwe? Kayisikho na okudala ukubola kwesizwe (corruption) lokhu? Sizwa njalo uMaNaba esekhuluma ngoMlimu ukuthi unceda abazincedayo, kodwa kasingakhohlwa njalo ukuthi omubi uyawasebenzisa amazwi kaMlimu esekela izenzo zakhe ezimbi ezingalunganga.
Ukhuluma into eyayisenzakala ngesikhathi somdlalo kuze kubekhathesi ukuthi ngenxa yobunzima bezomkhonomi sonke sesafunda ukuba ngamasela ngezindlela ezitshiyeneyo.
Nxa singavumelani loMaNaba kokunye kodwa uyaliveza iqiniso lempilo. Uthi udubo luyabuthundubeza ubuntu wonke umuntu adinge okunceda yena yedwa lemuli yakhe. Akekho onakekela omunye ngoba uthi laye kanakekelwa.
Kukondoda zibonele nxa sekulodubo. Elinye iqiniso elivezwa nguMaNaba ngelithi abaphathi abanengi sebafundisa okweminyaka eminengi kakhulu, sebezatshiya umsebenzi bathathe umhlalaphansi kodwa abalalutho olutshengisa ukuthi kudala basebenza.
UNdabeni uyalifakaza iqiniso lathi esilaziyo ukuthi abanengi abathatha umhlalaphansi yabo asilutho bacina bedinga eminye imisebenzi ukuze baphile ngoba ipentsheni yabo ayisilutho. Yikho okwenzakala khathesi lapho esizwa abantu abasebenza kudala ngokuthi ipentsheni zabo zincinyane kakhulu.Kusobala ukuthi ngumdlalo ophilayo lo olotshwe nguMuyambo.
