uMthunywa
YiNtatheli kaMthunywa
OKWAKUTHIWA ngeke kwenzeke, sekwenzakele! NgoLwesibili ntambama bakhona abalele bengadlanga, kwaba labanye abathabe bedlulisa ngoba uRodrick Mutuma usengumdlali weHighlanders.
Kuthethe amaviki amathathu ukuthi iqembu leBosso livumelane ukusebenzisa umdlali lo osuka kuDynamos.
Ngokuzwisisa kwephephandaba likazulu, uMutuma ubesedida amakhanda enkokheli labalandeli balithimu.
Bekungela kuzwanana ikakhulu kuqula le-executive lona ebelingazi ukuthi lingabe lisenza okufaneleyo.
Ngokuza kwakhe kuqembu, uMutuma usenikezwe amabizo okudlala. Usebizwa ngokuthi ‘Mntungwa’, ‘Nkosana’, abanye njalo bathi ngu‘Mthunywa’.
Umaneja kaMutuma uCarlos Tavengwa wazise abalandeli beHighlanders ukuthi bamukele umdlali lo ngezandla zonke. UTavengwa lilunga leBosso ngokugcweleyo njalo ungusomabhizimusi olodumo koBulawayo.
Uthe labo abacabanga ukuthi umdlali lo uzadanisa, abakhohlwe.
“IHighlanders yithimu yezwe lonke. UMutuma kudala efuna ukudlalela iqembu, ngakho asimnikeze ithuba. Uzadanisa abanengi.
“Nangu umdlali ozahlohla amabhola kuHighlanders. Kuyaziwa kunguqu yakithi ukuthi uMutuma uyahlohla, uzawathela emambuleni atshengise ukuthi udume ngani,” kutsho uTavengwa ngoLwesithathu.
UMorden Ngwenya umgcinisihlalo weHighlanders ubike ukuba kakaze abone umdlali olodumo njengoMutuma.
UNgwenya wazise abalandeli ukuthi uMutuma uthandwe nguAkbay ngakho nxa abaqeqetshi bevumelana, kutsho ukuba nguye umdlali obedingwa.
“Umdlali lo utshayanise abantu amakhanda. Angikhumbuli ngitsho lomdlali oyedwa owaphathwa emlonyeni njenga lo. Sithethe isikhathi eside sikhangelisisa ngaye, okuyinto engajwayelekanga kuHighlanders.
“Abaqeqetshi bethu basuthisekile njalo bakhona abalandeli abavumelana lakho,” nguNgwenya lo ekhuluma loMthunywa ngoLwesithathu ntambama eqeda kuhlolisisa amaphepha esivumelwano sikaMutuma.
Kusenjalo, abasekeli bakaMantengwane babika ukuba bayajabula ngokuthola uMutuma.
USimon Nxumalo olilunga labasekeli beBosso abaseVictoria Falls uthe uMutuma kazizwe ekhululelike.
“Mina angiboni icala ngomdlali lo ngoba banengi asebadlalela iBosso bevela kwamanye amathimu. UMurisa [Steward] wabuya wadlala kahle. Ngiyathemba loMutuma uzadlala kuhle.”
UInnocent Moyo osekela eseWest Nicholson uthe labo abangafuniyo ukuthi uMutuma adlalele iBosso, kungcono bayekele.
“Sivele silabo abadlali abasuka kwamanye amathimu abalisa iDynamos leCaps United. Ukwesaba ukuthi umdlali uphuma kuqembu elithile akusizi lutho. Abalandeli abazonda uMutuma bakhululekile ukuthi basekele amanye amathimu.”
