uMthunywa
Pumulani Mpofu
Ukubekezela kuyinto enhle kakhulu ngoba kusilethela impumela enhle kakhulu njalo kuba lomvuzo omuhle kakhulu ekucineni. Empilweni yethu jikelele zinengi izehlakalo ezisehlelayo njalo zenza ukubana sibe lethemba njalo sibekezele.
Nxa ijaha lifuna ukuthatha intombi liyabekezela, nxa ulangathelela impumela enhle ezifundweni zakho uyabekezela ubale ngokuqinileyo ukuze wamukele umvuzo omuhle. Kunjalo-ke nxa silungisa amalungelo ethu okwaziwa, kufuneka ukubekezela ukuze kube lempumela enhle. Kukho konke okwenzakalayo emahofisini ezincwadi zokwaziwa (Registry offices) kudingeka ukubekezela ukuze kulunge njalo sithole amalungelo ethu.
Kule iviki ngizathanda ukulazisa ngodaba lwentombazana ethiwa nguSihle Ndlovu eleminyaka elitshumi lasitshiyagalombili. USihle ngadibana laye emahofisi ethu eTrinity Project edinga ukwelulekwa mayelana lelulengo lakhe. USihle Ndlovu wazalelwa elizweni leSouth Africa. Ngaleso sikhathi unina uSikhangele Ndlovu wayengelawo amaphepha aqondileyo elungelo lokwaziwa eSouth Africa.
Ekubeletheni kwakhe esibhedlela saseThembisa eSouth Africa wasebenzisa amaphepha angekho emthethweni njalo esebenzisa ibizo elithi Kgomotso Mkwananzi. Wamkhulisa kuhle umntanakhe uSihle Ndlovu kodwa ngokuswelakala kwenhlanhla uSikhangele wabhubha etshiya uSihle elomnyaka owodwa.
Emva kwalesi sehlakalo uSikhangele wathathelwa incwadi yakhe yokufa khonale eSouth Africa njalo besebenzisa izincwadi zakhe ezingekho emthethweni ukuze bamthathele incwadi yakhe yokufa (death certificate). USihle wasuka-ke wazokhulela ngakibo kanina lapha koBulawayo. USihle wakhula wafunda kodwa wacina esibangeni sesifundo sesikhombisa ( Grade Seven).
USihle Ndlovu wadibana lezisebenzi zeTrinity Project kwenye yamakilinika lapho esihamba sifundisa khona abantu.
Weza kumahofisi eTrinity Project kumnyaka odluleyo kunyanga kaLwezi ukuze athole usizo. Okwakuqala kuSihle kwakufunakala ikhadi lakhe lesibhedlela (health card) elaseSouth Africa, incwadi yokufa kukanina, isihlobo sikanina esisodwa njalo esilobuhlobo obuvelayo ezincwadini zabo zokuzalwa, incwadi yesikolo lapho uSihle afunda khona kanye lemali engange$55 ukuze athole incwadi yakhe yokuzalwa .
USihle Ndlovu waphanga walungisa zonke lezizinto ayezelulekwe eTrinity Project ukuba azenze. Weza-ke lonina omncane, kodwa unina omncane wayengaselayo incwadi yokuzalwa kukamuyi uSikhangele Ndlovu kodwa elesithupha sakhe sephepha. Imali kabazange benelise ukubana bayithole ngakho-ke eTrinity Project sabaphathisa ngemali engange$50 ngoba sinanzelela ukubana uSihle Ndlovu wayeseleyakhe indodana eleminyaka emine.
Indodana yakhe yayingelayo incwadi yokuzalwa ngoba unina engelayo laye.USihle Ndlovu waqonda emahofini eMguza ukuze ayethatha incwadi yakhe yokuzalwa kanye lesithupha. Ngelanga lakhe lokuqala bamlungisela konke kodwa bamazisa ukubana kumele unina omncane abhale i-affidavit achaze ukubana uSikhangele kanye loKgomotso ngumuntu munye. Konke lokhu wakwenza ngoba elesithupha sakhe umuyi.
Kwadlula amaviki ayisithupha wabuyela uSihle ukubana ayethatha incwadi yokuzalwa kwakhe, wayithola iphumile kodwa ilephutha ngoba kulotshwe ibizo likanina elinguKgomotso hatshi uSikhangele. Bakulungisa emahofisini kodwa baphinda njalo bayithumela emahofisini amakhulu eHarare ukuze bamlungisele. Kwahlala kunjalo kwaze kwadlula izinyanga ezinhlanu yaze yaphuma kuviki ephelileyo kunyanga le kaNkwenkwezi. Kwamjabulisa kakhulu lokhu ngoba sokusitsho ukubana usezakwenelisa ukubuyela esikolo njalo athathise indodana yakhe incwadi yokuzalwa.
Konke lokhu kufezeka ngoba wabekezela kwaze kwalunga. Ingqobe ngiyitshiyela umphakathi wonke jikelele ukuthi singadeli ekulungiseleni amalungelo ethu okwaziwa.
Sihlanganeni njalo kuviki elizayo
Umlobi utholakala kunombolo zocingo ezithi 0773195 055 loba kukheli ethi [email protected]
