uMthunywa
silo Pumulani Mpofu
Akula sikolo esifundisa abantu ukuthi bakhulise njani abantwana, loba kulezinsuku abanye abalobi sebeloba ngendlela zokunakekela abantwana, balutshwane abayake bathinte ngelungelo labantwana elokwaziwa kulo umhlaba.
Kulabanye abazali abakwaziyo ukuthi kumele banakekele abantwababo bengakhunjuzwanga, kube labanye abasuke bakhohlwe umsebenzi wabo njengabazali. Ukudla lezigqoko akwenzi umntwana enelise ukuthi aye esikolo, kuqakathekile nje ukuthi umntwana abelencwadi yakhe yokuzalwa.
Abazali bonke kumele bahlale becabanga ukuthi abantwababo bayakhula njalo bayawabona amaphutha abawenzayo. Abantwana bafuna ukuthi nxa bekhula abazali babo bebengabantu abalesithunzi abakhangelela kibo ukuthi bathole loba yini abayifunayo. Abazali bengaqala ukungani bayehluleka ukuthi banakekele abantwababo, abantwana bandise ukubona ingani abazali babo ababathandi ngoba phela bayabe bebona ontanga babo besenzelwa izinto ezinengi ezibajabulisayo. Kuqakathekile nje ukuthi abazali kukhanye ukuthi bayazama kulokuthi bahle nje bazihlalele.
Kule iviki ngithole ithuba lokuxoxisana lomama wakoSithole uRosina. URosina ngumakhelwane kaStephen Maseko loJane Mathuthu. URosina uthi sowazi uStephen loJane okweminyaka engamatshumi lasithupha besese lijaha lentombi. Nxa siqhubeka sixoxa uRosina uveza ukuthi uStephen loJane balabantwana abayisithupha; amankazana amathathu lamajaha amathathu. Kubo bonke laba abantwana akula oyake aye esikolo ngoba abazali babo bathi abalancwadi zokuzalwa ngoba uStephen uthi bancitshwa ama-birth confirmation records ngenxa yokuthi babelesikwelede esibhedlela lapho uJane abelethela khona abantwana abane. Kukanti laba abanye ababili, uJane wababelethela endlini kibo eFilabusi, njalo kalamali yokuthi agade ibhasi ayekibo njalo lonina owambelethisayo sowabhubha.
URosina uthi nxa ebabuza ukuthi bayake beyebuzisisa ngesikwelede abalaso esibhedlela baphendula besithi sinengi kakhulu njalo bayesaba lokuyabuza ngoba abala imali yokusibhadala. URosina uthi into emdanisayo yikuthi abazali akula lutho abalwenzayo olubambekayo olutshengisa ukuthi bayazama kodwa bayehluleka ukuthi batholele abantwababo incwadi zokuzalwa. Okumzwisa ubuhlungu kakhulu yikuthi bayabe sebezwisa usizi nxa bebona abantwana bakaRosina besiya esikolo, bona bengakwazi ngitsho lokubhala amabizo abo.
Abantwana sebazama ukuthi bakhulume labazali babo ukuthi bazame ukubathathela incwadi zokuzalwa kodwa akula phakathi kwabo okhanya elomdlandla wokuthi azwe etshiseka elomlandu wokuthi azame ukukhulumisana lomunye wakhe ukuthi bayethathela abantwana incwadi zokuzalwa. UStephen loJane abasebenzi kodwa baphila ngokulima imibhida bethengisa.Nxa bexoxisa loRosina bathi bona abala mali ngaphandle kweyokuthenga ukudla.
UStephen loJane kabafuni khona ukuyadinga usizo lolwazi lokuthi bangathatha nyathelo bani ukuthi bathathele abantwababo incwadi zokuzalwa. Into eyangizwisa usizi yikuthi uStephen loJane bayehluleka ukuthi babuye bazozizwela kodwa babona kungcono ukuthi baphe umakhelwane wabo izithupha zabo lama-health card abantwana ukuthi azokuzwa ukuthi bengenza njani ukuthi bezebenelise ukuthola incwadi zokuzalwa zabantwababo.
Ngithanda ukuthi ngikhuthaze abazali ukuthi bafe bezamile ezintweni eziphathelane labantwababo, ngoba yibo abayabe sebekhala futhi nxa abantwababo sebebazonda bengasafuni kubasiza nxa bona sebeluphele. Kuhle nje ukuthi njengemuli sibe lobudlelwano obuhle.
Asihlanganeni ngeviki ezayo.
Umlobi utholakala kukheli elithi [email protected] lakunombolo zocingo ezithi 0773 195 055.
