uMthunywa
Ngeviki edluleyo sitshiye uBubbles esegalula phakathi kweqembu lezikliwi. Abangane laba ayesephila labo eHarare babemfundisa bonke ububi bomhlaba. Ngokuthatheka laye uBubbles wehlukela ukuzinuka amakhwapha akhumbule emuva lapho avela khona.
Inhliziyo yokubonga ikhatshana kuye nxa eseqala ukutshontshela uSister Zwelo, kumveza engumuntu ongabongiyo. Siyananzelela njalo ukuthi ungumuntu ongazicabangeliyo empilweni, oselibele udubo aphuma kulo lalolo avele elutshiyele uNgonyama emuva.
Babelawo wonke amaqhinga obusela ayedinga umuntu ohlakaniphileyo njalo ezimiseleyo. Konke babekwenza bengela nembeza, okwabo kuyikuthola imali kuphela. Zatshova izinsuku uBubbles ezidlalela umdlalo wakhe wamakhasi, wayewuthanda okwamagama umdlalo lo. USister Zwelo laye waqala ukunanzelela ukuthi ngezikhathi zokuzilibazisa uBubbles wayengasabuyi ukuzohlala labo endlini yokukwejisa, ngesikhathi sokubukela umabonakude wayengasabonakali lapha endlini. Wabuye waziduduza ngelithi mhlawumbe wayesethole okulelihlo elilodwa lapha ayesezilibazisa khona.
Eqala ukufika koSister Zwelo lapha uBubbles wayezimisele ukuguqulela impilo yakhe ebuhleni kwaphelela emoyeni.
Wayenqume ukudinga umsebenzi ongcono azame njalo laye ukuzikhuphula langokuya esikolo avuse inkophe, konke lokhu kwabayize. Wayeselengqondo ethi okudingakalayo empilweni yimali qha. Pho njengoba yena wayesethole indlela engcono yokuzuza imali kungela kuganga ngitsho pho wayesezikhathazelani. Wayesekhethe indlela yobusela kuphela.
Abadala bathi akuqili lazikhotha emhlane, betsho beqinisile. Umuntu uyazenza iziga kodwa libekhona nje eliyisithutha. Njengoba wayengumdlali wamakhasi uBubbles wayesewatshova alale khona. Lapho ababedlalela khona babethengiselwa utshwala kunye lezidakamizwa.
Kokubili lokhu kwakuthi nxa sekuxhwatha ekhanda umuntu ahlanye aze azilibale igama lakhe nje. Kwathi-ke ngelinye ilanga njengenhlalayenza, iqembu labangane layabuthana endlini kaMankolo, lowo phela wayesengumngane omkhulu kaBubbles. Yaqhubeka imidlalo yensuku zonke kwafika lapho okwadaleka khona inkemenkeme yendaba. Kwakulomdlali wamakhasi lapho okwakuthiwa nguFreddy, indoda le yayisaziwa ngokuthi yona-ke ingadliwa kayithandi ukukhipha esambeni sayo.
Lelolanga-ke uFreddy wayengabuzanga elangeni. UBubbles wayifuna esandleni eyakhe imbadalo. Lapho-ke kwavuka umsindo, kwabanzima. UFreddy wayinyathela emsileni ngokukhafulela uBubbles ebusweni. Lapho kwaba luthuli lothudlana. UBubbles wamwisela phansi uFreddy ngenqindi kwathi njengoba laye uFreddy wayeyinkunzi ngokuphazima kwelihlo wayesephethe umhedla wengqamu esandleni. Wayezimisele ukuqeda uBubbles ngawo ngokusweleka kwenhlanhla nguye owasuka wabulawa yileyo ngqamu.
