uMthunywa
Kusahluko sesithupha sihlangana loBubbles ephethwe ngumzwangedwa wokutshiya umntwana eNkanyiso.
Wayezama ngazo zonke indlela ukuxotsha umzwangedwa kodwa wayesebunzimeni umfanekiso kaKhotso wayewubona amehlo akhe ethe nhlo egcwele izinyembezi ebihla. Umfanekiso lo wawumhlupha kubi uBubbles lalapho enye indoda izame ukumxoxisa kwakungani nje wenza umsindo angawuzwisisiyo. Wayehlezi phakathi kwebhasi umfanekiso ulokhu ubhodabhoda engqondweni yakhe. Yiyisidla amahabula ibhasi ibakhafula ibaginya laye uBubbles waze wafika lapho aluqondise khona.
Uthe esehla into yokuqala kwaba yikuphumputha imali yakhe esambeni sakhe. Wazizwa ejabula kodwa umfanekiso kaKhotso wawulokhu ukuye. Lokhu kuchaza ngokugcweleyo ukuthi uBubbles wayemthanda umtanakhe loba nje wayemtshiye ngendlela ezwisa ubuhlungu. Wazizwa esethethela ngenhliziyo ecela uxolo kuKhotso wakhe emuva lokuthi uNgonyama wayengamondla ngcono kulaye yikho wayethethe leso sinqumo.
Waqonda ekhefa lapho ahle atshaywa luqhatshi engena nje emnyango. Wangena-ke wathenga ezifela emlonyeni.
Uthe engakaze avule umlomo wafika njalo umfanekiso kaKhotso inhliziyo yahle yabamyama wehluleka khona nje ukudla. Lephunga leli elalihle likuqale iphango wayengasalizwa ngitsho. Wezwa etshaywa luvalo olungajayelekanga waze wethuka. Wabona nje kungekho enye indlela wazibamba ngamandla wadla ukudla kwakhe waze waqeda.
Wazama ukuzilibazisa ngokubhodabhoda ledolobho kulezondawo ayebona ingani angahlangana labamaziyo, abathanda indaba. Wayelokhu ebhoda esidla isikhathi sokuvulwa kwendawo zokunathela. Kwathi nje kuvulwa wayesephakathi. Wabunatha waze wazizwa eseyindoda emadodeni walibala langomfanekiso kaKhotso owawusumhluphile okwamagama.
Kwathi kutshaya ihola lesithupha ntambama wangena isitimela esiqonda eKwekwe kulapho ayesecabange ukuya qala impilo entsha. Yena ngokwakhe wayebona kuyindlela eqondileyo leyo, owakhe umthwalo awutshiyele uNgonyama. Sahotshozela isitimela sihamba sidobha sikhafula singakhethi mhlobo. Kwakukhona eyayidonsa isiginci sekatali lapha esitimeleni kubenzima.
Abantu bonke babeka amagama ahlaba ngaphakathi. Babeyibonga ngemihlobohlobo yezitemo abanye bejikela amasenti uBubbles akukhulunywa lapho yena-ke wayesejikele kwaze kwaba kasikhombisa, khonapho ejikela amasenti alitshumi ngesikhathi imali inengi okumangalisayo. Wenza konke lokhu utshiye umntwana engelampahla zokugqoka ehamba ngamabhetshu kodwa uyenelisa ukukholisisa abanye abantu. Lapha-ke kuyacaca ukuthi uBubbles ngumuntu owayelombono omfitshane kakhulu ngokwezokuhleleka kwempilo.
