uMthunywa
silo Pumulani Mpofu
Kuqakathekile ukuba abantu bahlale bebhale incwadi yokwaba ilifa ukwenzela ikusasa labantwana ngoba abantu abasuka bahlale labo ngemva kokubhubha kwabazali bajayele ukubathathela konke basale bedubeka.
Nxa umfazi engendela kweyinye indoda ngemva kokuthola ilifa lomkakhe kuqakathekile ukuba ahlale ebhale incwadi yokwaba ilifa.
USinanzeni Dube wayetshade loPhilani Gumede okweminyaka elitshumi baba labantwana ababili. UPhilani wayengusomabhizimusi, elezindlu lezimota ezinengi.
Wasebhubha uPhilani yonke into wayitshiyela umfazi wakhe uSinanzeni. Kwathi ngemva kweminyaka emithathu uSinanzeni wasetshada lenye indoda uJabulani Khuphe.
Wahlala loKhuphe labantwana bakhe wazitshela ukuba sebengumdeni yonke into singeyabo bonke.
Sinanzeni loJabulani baba lomntwana oyedwa kwaba ngumnyama uSinanzeni wabanjwa ikhensa yebele eyahle yamkhulela, walala phansi waze wabhubha.
Ngemva kokubhubha kwakhe abantwana bakhe basala loKhuphe waba nguye owayesezibambile kuzo zonke izinto ezazitshiyelwe uSinanzeni ngumkakhe.
Abantwana bakaSinanzeni kazange abaphathe kuhle ngoba wazitshela ukuthi ngabeyinye indoda wazikhangelela owakhe.
Wabaphatha buhlungu abantwana bakaSinanzeni loPhilani baxotshwa endlini bengelalutho, uJabulani wasala lezindlu zonke lezimota kwangani nguye owakusebenzelayo abanikazi belifa sebedubeka.
Lokhu akwenzakali kuphela nxa umfazi esele wenda, lemadodeni lakho kuyenzakala nxa isele yathatha ngemva kokubhubha komfazi.
USikhosana Khumalo wayetshade loNomsa Ndebele belabantwana ababili.
USikhosana loNomsa babelesitolo lendlu yabo eMahatshula. UNomsa wabhubha watshiya abantwana besesebancane okwenza uSikhosana wathatha omunye umfazi uNokuthula.
Batshada uSikhosana loNokuthula bahlala endlini yonaleyo eMahatshula kwathi ngemva kweminyaka emithathu wabhubha uSikhosana watshiya abantwana loNokuthula.
Yena uSikhosana loNokuthula babengazange babe labantwana ngemva kokubhubha kukaSikhosana, uNokuthula waqala ukuthengisa impahla engazihluphi ngabantwana bakaSikhosana.
Wathatha abantwana wayabatshiya kuninazala ekhaya kugogo wabantwana ethi yena kenelisi ukubagcina.
Wabatshiya behawula abantwana bakaSikhosana ekhaya yena wayazikholisela edolobheni ezidlela yonke imali eyatshiywa nguSikhosana.
Aluba uSikhosana wayehlale ebhale incwadi yokwaba ilifa wabhala abantwana kwakuzakwenza umthetho ubavikele, uNokuthula kwakuzamzimela ukuthengisa impahla yonke kaSikhosana akhiphe labantwana endlini.
Ngakho-ke lokhu kuyasifundisa ukuba umuntu kumele ahlale ebhale incwadi yokwabiwa kwelifa ukuze avikele abantwana bakhe njalo kuyindlela yokuthi ikusasa labantwana libe lihle bengadubeki.
Umlobi utholakala kukheli ethi [email protected], www.trinityproject.biz loba kunombolo zocingo ezithi 0773195055
