uMthunywa
Zinengi izehlakalo esidibana lazo empilweni njalo ezikhathaza umoya wethu. Lezizehlakalo zigoqela imikhuhlane, ukufa kanye lokunye okunengi. Kukho konke esihlangana lakho empilweni ukufa yikho okusihlukumeza kakhulukazi.
Izikhathi ezinengi nxa kufiwe abantu bakhala baze bazibhuqe phansi kodwa-ke ngokuxoxisana kwami labantu abanengi eTrinity Project ngithi “Kasikhale ngelihlo elilodwa” ngoba ungalalisa uphaphama izinto sezokonakele.
Ngiyazi ukufa kuyinto ebuhlungu kodwa kubuhlungu ukusala udubeka ngenxa yokubana suthathelwe ilifa lakho ngabantu abazenza izihlakaniphi.
Kule iviki ngithole ithuba lokuxoxisana lomfelokazi othiwa nguKudzai Mhofu. UKudzai wayethethwe nguKudzaishe Hove ngokwesintu njalo bazala abantwana ababili okuthiwa nguTendai kanye loTatenda Hove. Bobabili babethenge imota kanye lempahla zendlini kodwa bengelayo indlu kodwa beloja edolobheni laseHarare. Konke lokhu bakwenelisa ngoba uKudazishe Hove wayesebenza eNgwebu. UKudzaishe wabanjwa ngumkhuhlane wagula wabhubha wasengcwatshelwa ekhaya kibo eBikita. Ekumngcwabeni lapho uKudzai Mhofu wayedabukile kakhulu ngakho kazange ahambe lezihlobo zomkakhe ukubana ayethatha incwadi yokufa komkakhe.
Ekufikeni kwabo emahofisini bathatha incwadi yokufa bathi umuyi wayelomfazi kodwa onguye owasayinayo esengumkakhe ngudadewabo abazalwa bonke kumama hatshi kubaba njalo ubuhlobo babo abukhanyi kalula ngoba unina wabo kazange abathathise incwadi zokuzalwa.
Ekuphindeleni kwabo ekhaya kabamazisanga uKudzai ukubana bahambe njani ekuthatheni incwadi yokufa komkakhe kodwa bavela nje bamazisa ukubana imota kumele iphiwe umnewabo kamuyi ngoba uKudzai Mhofu kasoke enelise ukuyiphatha kuhle njalo ungumfazi usengacina ekhomba amandla kamuyi adliwe ngenye indoda. Impahla kwathiwa kumele zabiwe ngoba umnikazi wazo sebhubhile.
Kwamzwisa ubuhlungu uKudzai kodwa-ke uninazala wasesithi kazingabiwa impahla ngoba abantwana bazazisebenzisa.
UKudzai wasuka-ke waqonda emahofisini e-pension kodwa-ke bamazisa ukubana kufuneka incwadi yokufa komkakhe kanye lezincwadi zokuzalwa zabantwana. Wabuyela kwabozala wayayicela bamupha kodwa-ke ekufikeni kwakhe e-pensions office bananzelela ukubana incwadi yokufa ilotshwe umfelwakazi ongayisuye uKudzai Mhofu ngakho-ke kumele bayelungisa incwadi yokufa kakutsha ngendlela eqondileyo.
Ububi bakhona yikubana uKudzai kasakwazi ukubana abakwabozala angabathola ngaphi ngoba kuzwakala angathi sebathutha eBikita. ETrinity Project sameluleka ngokubana kadinge udadewabo kamuyi ukuze ayechaza emahofisini (Registry Office) ukubana kungani ezithi ungumkakhe kamuyi. Lobubunzima sobudale ukubana abantwana bangasafundi ngoba unina engumuntu ohlala egula njalo kenelisi ukubana ababhadalele imali yesikolo (school fees).
Ingqobe ngiyitshiya kumphakathi, asiqaphele ezikhathini zokufa ngoba siphila lamaganyane ezimulini zethu ezihahabela ilifa labanye.
Kasihlanganeni njalo kuviki elizayo.
