uMthunywa
Mthokozisi Dube
IQEMBU lamaGamecocks, iChicken Inn lisebunzimeni bokubhadala isikwelede somdlali kulandela isinqumo senhlanganiso emela abadlali iFootballers Union of Zimbabwe (FUZ) ukuthi amaqembu kumele ahlawule abadlali imali zama-signing on fees ngokuphangisa.
Lokhu kuza kulandela ukuthi iqembu lama-Gamecocks lisayine abadlali ababili uDarryll Nyandoro loChristopher Samakweri ngapha lilokhe libelethe isikwelede sokuhlawula uToto Banda.
UMthunywa ubikelwe yiFUZ ukuba iChicken Inn ngokunanzelela ukuthi isebunzimeni, icine isenza isivumelwano sokubhadala ngoba ingenelisi ukuhlawula lababadlali. Kuvele ukuba inani lesikwelede lesi angeke sitshelwe intatheli ngenxa yokuthi kungephula isivumelwano lesi.
Ekhuluma loMthunywa ngoLwesithathu, omele inhlanganiso yeFUZ koBulawayo uHerbert Dick ubike ukuba inhlanganiso yakhe isize yangena kusivumelwano sokuthi iChicken Inn ihlawule njani.
“IChicken Inn isize yazokhulumisana lathi ukuthi izahlawula njani imali kaToto Banda, kungakho sithi ayisiyo yodwa sizangena kuwo wonke amaqembu ezenguqu ngoba siqakathekisa abadlali bethu,” kubika uDick.
UDick ubike ukuba iqembu lamapholisa iBlackboots lalo lingene kusivumelwano esifanayo ngoba lilesikwelede kubadlali abayisithupha ababalisa owake wadla ubhedu kuChipangano uSimon Njeleza umqeqetshi wabonozinti uDumisani Ncube, uNtokozo Tshuma, uJames Chikwenga, Trevor Ncube, Ronald Gumede kanye loPrice Nkomo.
“Amaqembu kumele nje enze afanele akwenze ngoba abadlali bephila ngebhola kungakho ukungabaniki imali amaqembu ayabe esithi abadlali baphile ngani njalo njani?” kubuza uDick.
UDick uqhubekele phambili ebika ukuba abadlali kababe ngamalunga eFUZ hatshi ukuthi babuye sebesenkingeni.
“Lokhu kuyafanana leFuneral Policy, awungeke ubelilunga umuntu esefile kodwa kumele uzilungiselele kusaselesikhathi,”kuveza uDick.
UDick wengezelele ebika esithi kuyinto embi kakhulu ukuthi amaqembu ezenguqu ayekela ukukhuluma labadlali mayelana lekusasa lama-contracts abo kuze kuyefika emaphethelweni besenzela ukubabambela ama-clearance letters.
“I-FUZ izenza konke okusemandleni ayo ukuthi amaqembu angakwenzi lokho kodwa sithi abadlali abangene kule inhlanganiso ngoba kuyi-$5 ngenyanga okutsho ukuthi yi -$65 ngomnyaka.”
UDick usole kakhulu isimo somdlalo wakuleli wona awuchaze ngokuthi usasephansi.
“Kusamele sithathe isibonelo kweleSouth Africa, amaqembu ancenge abadlali kusaselesikhathi hatshi ukuqala inkulumo lomdlali ngoba esefunwa liqembu elithile,” kubika uDick.
UDick uphethe ngokubika ukuba inhlanganiso yakhe ibizaqhuba umhlangano wokufundisa abadlali abangelamisebenzi kodwa ngenxa yobufitshane bekhefu sebezawuqhuba ngomnyaka ozayo.
