uMthunywa
Charles Dube
UMbengo oyilihlo lenduna eHadlana simtshiye esuka ngesiphangiphangi etshwaleni obabusemzini kamkhula wakhe uWozoli.
Kwenzakala kanje ngoba usedelelwe ngomunye owaliwa butshwala uMaliwa.
UMaliwayikudla lo katshayi inja efihle umphini ngoba utshovelwa butshwala.
Uhleka uMbengo ngesiga esesifika emzini wakhe.
UmntakaMbengo uSilobile obekuthiwa ufundile nanku phela ubengumbalisikazi eMangala ukutshiyile konke lokho eseyengwe nguNgenzile umntakaVulela wahamba laye edolobheni lakoBulawayo ethi kulemisebenzi engcono kuboMesisi besiLungu njalo babhadala ngcono.
UMaliwa-ke uklolodela uMbengo ethi vele kwakuthiwa kwenziwani kuhanjiswa abantwana ezikolo. Uthi kwakudlaliselwani imali.
Sikhumbule bafundi ukuthi lapha yisikhathi imfundo iqala ukungena kulumkhona ongezanzi kwelaMaNdebele, abantu babengakakwemukeli ukuthi abantwana basiwe ezikolo ngaphandle kwalabo abanjengaboMbengo ababesenelisa ukubona izinto eziphambili ezinjengokuthi imfundo iqakathekile.
Ababesaselobuntu kwabalela ukuthi bamekele aqhubekele phambili uMaliwa etshengisa indelelo kuMbengo umuntu owayehlonitshwa yisigaba sonke ngenxa yesikhundla sakhe sokuba yilihlo lenduna.
UMbengo wanqanda indoda yakoNdlovu eyayisiphakeme isimlanda yena Maliwa lowo.
Ngaleso senzo uMbengo watshengisa ubuntu lokungavumeli inhliziyo.
Watshela uNdlovu ukuthi kabe lesibindi njalo angazinindi.
Watshengisa ukungabi lephaphu njengoNdlovu, lona eliphaphazelayo.
Uthe esiyaphambili uMbengo wathi uqinisile uMaliwa, kodwa wona ngokukhuluma esenathile, esedakiwe.
Yikho lapho avuma khona njalo uMbengo ukuthi abantwana bayabenza baze bakhonkothwe layizinja esitsho bona oMaliwa abantukazana okumele ukuthi babahloniphe oMbengo kodwa ngenxa yokuthi abantwana babo sebebayangisile emphakathini sokusenza lokungabantukazana kubahleke, kubayangise. Sebedelelwa ngokungabantukazana.
UMbengo watshengisa umehluko phakathi kwakhe lomkakhe uMaNgwenya, ngoba wathi eseyilandile indaba kaMaliwa uMaNgwenya wathukuthela wathi aluba kwakunguye ovunula amabhetshu aluba sewake wamgijimisa ngenduku uMaliwa wabo lowo.
UMbengo yena watshengisa ukuthi lanxa ethukuthele kodwa uyazibamba ngoba wathi aluba wayethanda ngabe wammahlaza ikhanda ngembokodo yena Maliwa lowo.
UMaNgwenya yena wafisa ukuthi uNcube, uMbengo phela aluba ukwenzile lokho.
UMbengo utshengisa ukuthi uyesaba ukwenza ulutho oluzamyangisa ngaphambilini ngoba uthi aluba ukwenzile lokho ukummahlaza uMaliwa ubezangena kuwuphi umhome (umlindi).
Siyatshelwa ukuthi aluba bonke abantu baye bathi nxa igazi labo selibila, bazibuze ukuthi bazangena kuwuphi umhome, ngabe kakho othonisiswayo ebantwini; ngabe kabakho oNgenzile labo Silobile.
Omaliwayikudla ngabe kabakho.
Umlobi uyasitshengisa ukuthi phakathi kwabantu jikelele, abasweleki othathawese. Labo yilaba abathwala izindaba abazizwileyo bahambe bezifafaza indawo yonke.
Omunye umlingiswa umlobi umupha ibizo elihambelana lakho lokhu ukuthwala izindaba athi ngunakaZindaba.
Okumele sikunanzelele yikuthi lokhu liqiniso bagcwele yonke indawo lapho okulabantu khona oNakaZindaba labo SekaZindaba.
Nangu uNakaZindaba uyayiqalisa indaba kaMbengo loMaliwa etshela uNakaSenzile ethi kuthiwa uMaliwa umyangisile uMbengo phakathi kwabantu njalo uyakuveza ukuthi buyamala utshwala uMaliwa.
Siyiqala lapha lindaba ngeviki ezayo, funda uzizwele lapho eyakhona.
