uMthunywa
SiloMehleli Dube
IKhisimusi ngelinye lamalanga ekhefu eliqakathekileyo kakhulu ebantwini abansundu, yiso phela isikhathi okuhlangana khona izihlobo labangane, lemitshado iba minengi, lamankampani amanengi ayabe evalile izisebenzi ziphumula, labasebenzela emazweni esakhelane lawo sibi sabavela phetsheya kwezilwandle bayabe bethe wathalala emakhaya, abanye njalo bayabe bebuyisa izihlobo zabo esezaya kobhekabezayo ngitsho emafini.
Imvama kuyabe kujatshulwa kuhlatshwe imbuzi, inkomo kudliwa inyama labamasonto labo balayo indlela abazijabulisa ngayo ngalelilanga. Okungonkabi kangisakhulumi, uthola okunye sekuqhuba imbuzi ugologo esekuthethe kungasazi lokuthi kubambephi kuyephi. Yisikhathi sokujabula kodwa kuyabe kufuna umuntu azibambe angakhohlwa ukuthi kusasa kuyizolo, ngiyangibone abanye abantu basuke bathabe kakhulu idliwe imali iphele du kuthi nxa umnyaka usuqalisa sekumele umuntu abuyele emsebenzini imali engasela, ikakhulu injiva ezinengi zisuka zidlulise amalawulo ngokuthaba, uthole sekuthengiswa omakhalekhukhwini ngentengo ephansi eselwisa ukuthi agade abuyele, ezinye injiva zize zincedwe ngabazali kumbe izihlobo labangane sebethengisa imbuzi besiza omunye wabo ongasela mali yokugibela njengokutsho kwazo injiva, zithembise ukuthi nxa zifika eGoli ziyothumeza ngokuphazima kweso kodwa balinde abantu benkosi kuze kuphele umnyaka lalapho bethi bazama ukumthola emoyeni kumakhalekhukhwini uthole ukuthi sewatshintsha lenombolo.
Abanye khonapha emadolobheni kuthengwa lezinye izinto ezingelancedo zithi nxa sezivulwa izikolo abantwana sekumele baye esikolo banqume labomatshonisa beboleka imali ezalayo, ahawule umuntu wabantu phela uyabe sekungani lento ayisebenzelayo akayazi ngoba umatshonisa efuna ingxenye yakhe. Kumele sijabule sikwazi ukuthi kulekusasa funa uqale umnyaka omutsha ususenkingeni, lezingozi zemigwaqweni ziba zinengi ngoba abantu bayabe beyaluzela besiya le lale okomhlambi kazalusile. Abanye bacina bebulawa yizisu ngokudla izinto abangajwayelanga ukuzidla ahude umuntu uthole lamehlo esewele phakathi emhlophe okwechalaha elidle itshefu ngapha ebhodla isibhoho. Yikho ngithi kuwe ubeleKhisimusi elilitshukela uqaphele izingozi uziphathe, uNkulunkulu akwenzele okuhle.
Ayixabene
