uMthunywa
Ethel Ncube
AKUBIZWA ozwayo emcimbini kaMapressa Lavida eMzansi Afrika ngoMgqibelo kuyonale iviki lapho okuzabe kulabosaziwayo beMzansi labeZimbabwe.
Umcimbi lo uzakwenzelwa eWinchenster Hills lapho okuzabe kuhlangene futhi ingcitshi kwezokugqoka ama-fashion designers abasacathulayo abazabe bebuye labakuthungileyo.
Kukhangelelwe ukuthi kube labahluleli abatshiyeneyo kugoqela uRapulana Seiphemo owaziwa ngokuthi nguTau kuGenerations.
UMthunywa uxhumane lomunye wabanikazi bomcimbi lo uMapressa oveze ukuba amalungiselelo asephelile sokulindwe ilanga.
“Umcimbi lo sesilesikhathi siwulungiselela, konke sokulungile, sesimelele ilanga ukuthi lifike abantu bajabule. Abazaphatheka emcimbini lo yizizalwane zeZimbabwe lezeSouth Africa.
Abanye abavela eZimbabwe sebefikile eMzansi. Osaziwayo abazabe bekhona nguNtosh, uRapulana, Afro Big Nuz labanye abanengi,” kubika uMapressa.
Uqhubekele phambili eveza ukuba emcimbini lo bazaphakamisa njalo ama-fashion designers asaqalayo.
“Kuzabe kulomncintiswano wama-fashion designers abanikwe ithuba lokuba bathunge izigqoko ze-summer. Kulabo abazabe bethunge kuhle kulemivuzo egoqela iR2 000, ukulala ubusuku obubodwa eLavida Guest House uthola i-massage lokudla mahala. Ngithanda ukunxusa abantu ukuthi baze ngobunengi babo bazojabula,” kuphetha uMapressa.
