uMthunywa
YiNtatheli kaMthunywa
AKUBIZWA ozwayo kusasa kumqhugelwano wenguqu yabantwana bezikolo kunkezo yeIngwebu enkundleni yeBarbourfields koBulawayo.
Kusukela ngenyanga kaNhlangula, izikolo zincintisane ezabelweni anduba kusale intshantshu ezizadlala kusasa.
KoBulawayo ngomnyaka odluleyo kwanqoba iRobert Tredgold, eMatabeleland South kwanqoba ithimu yesikolo seBhutshe esisesiqintini seBulilima. Esabelweni seMatabeleland North ithemba lisebafaneni beMalunkulu abeLupane.
Lonyaka isabelo seMatabeleland South sizamelwa yiTongwe leNkazhe.
Isikolo esinqobe eMatabeleland South yiTongwe yeBeitbridge ngemva kokunqoba iNkazhe 1-0. Imidlalo ibiseMaphisa.
ITongwe izathembela kumgadli wayo uDean Mbedzi, njalo kuzamele isebenzele ukulungisisa abadlali bayo bangemuva okukhanya bayalala nxa bethwe bahlaselwa.
Isikolo seNkazhe sona sizangena kuma-final ngenxa yokuthi iMat South yiyo eqoqa imidlalo yalonyaka. Isabelo esilomlandu wokuqoqa umncintiswano lo sinikezwa imvumo yokuthi simelwe ngamathimu amabili.
IMkhalipe Primary ephuma eGwanda South ithethe imali engange $800 ngokuqeda ikunombolo yesithathu ngokudla iSanzukwi 1-0.
IBhutshe, eyabayintshantshu yanyakenye yehluleke kakhulu. Iqede imidlalo ikunombolo yesithupha.
Kusigaba samankazana, isikolo seLongfield esiqintini seMzingwane yiso intshantshu. Sibhaxabule iBrunapeg 3-0.
Isabelo seMat North sizaqhuba imidlalo yalonyaka esiqintini seNkayi.
Phezu kwalokhu, kuzadlala lamathimu amankazana ezikolo. Inkampani yeNgwebu ngeyokuqala ukusekela umdlalo wenguqu yamankazana ezikolo zemfundo ye-Primary.
Akukaze kudlale amankazana kumncintiswano weNgwebu.
Isikolo seButshe sikhanya sibukhali emambuleni ngoba abagadli baso abaphuzi ukuthulula imvema. Yiso isikolo esilakho ukufaka umncintiswano onzima kwamanye amathimu.
Ukubusa kwezikolo zemadolobheni kuphelile lonyaka, nanko phela izikolo zemaphandleni zizimisele ukuthi inkezo isale kubo, ikakhulu eMatabeleland North.
Lonyaka umncintiswano weNgwebu uguqukile ngokufaka isinqumo sokuthi izikolo zonke zigqoke ama-boots.
Kuminyaka edluleyo, inkezo le ibilemithetho elula ekuthini amanye amathimu ayelabadlali abalikhaba ngenyawo.
Inengi lezikolo zemaphandleni beziswela impahla eyaneleyo okuyikho okwenza zibhuqwe ngezisemadolobheni.
Inhlanganiso yabaphathi bezikolo ze-Primary iNational Association of Primary Heads (Naph), ibika ukuba iyasuthiseka ngosizo lweNgwebu.
Abahlawuleli benkezo bazaphathisa izikolo ngama-boots la kanye lama-kit kusigaba sama-final.
Umphathi omkhulu esabelweni seMatabeleland North uCharles Ndiweni ubike ukuba ukutholakala kwama-boots kwenze izikolo zaphakamisa isisindo somdlalo wazo ezigabeni.
“Bekunzima ukuthi izikolo zemaphandleni zidlale ngokupheleleyo nxa zidibana lezemadolobheni. Abafana bebesesaba ukuhlanganela lalowo ogqoke ama-boots. Sakunanzelela lokhu, sabona kufanele ukuthi izikolo zonke zifane. Umncintiswano lo usuhlukene kulalokho ebesikubona kuminyaka edluleyo. Akuselathimu eyesaba eyinye khathesi.”
