uMthunywa
YiNtatheli kaMthunywa
IZIKOLO zisilela emuva kumdlalo wokugijima nanko ingcitshi kwezokuqeqetshwa kwemidlalo le zibika ukuthi kunengi okusamele kwenziwe ukuze ilizwe liqale ukuncintisa ngamandla kumijaho yaphezulu.
UManuel Mpofu umgcinisihlalo weBulawayo Athletics Board ophinda abengumqondisi wezokuqeqetsha kulinhlanganiso uthe balokudana ngendlela abantwana besikolo abagijima ngayo ngoba kuveza ukuthi abalolongwa ngokufaneleyo.
Ngemva kokuhlolisisa indlela izikolo zakoBulawayo ezilolonga ngayo kumdlalo wokugijima, inhlanganiso yeBulawayo Athletics Board isihlele ukuthi ibambisane lengatsha zabaphathi bezikolo.
UMpofu uthe kulumnyaka ukhangelelwe ukuthi afundise ababalisi bomdlalo wokugijima encedisana lenhlanganiso yeBulawayo Athletics Board.
Ekhuluma kumncintiswano wezikolo zakoBulawayo enkundleni yeWhite City, uMpofu ukhalaze wathi abantwana bayehluleka ukugijima ngesikhathi.
“Umdlalo wokugijima ungumncintiswano. Lo ogijimayo kumele akwazi ukuthi ugijimisa isikhathi. Engikubona lapha kuzikolo zakoBulawayo kuyadanisa ngoba abantwana abagijimi ngendlela efaneleyo.
“Inhlanganiso yeBulawayo Athletics Board izancedisa abantwana balezizikolo ukuthi bafunde ukusebenzisa isikhathi kumdlalo wokugijima. Nxa kuthiwa kulentshantshu zesiqubu kulumdlalo, kutshiwo labo abaqeda umango ngesikhathi esifitshane. Yikho okumele kufundiswe abantwana. Izikolo ezinengi azikwazi ukuthi lokhu kubalulekile ikakhulu nxa abantwana sebegijima kumincintiswano yaphezulu.”
UMpofu uthe inhlanganiso yabo ikhethe ukusebenza lezikolo ngenxa yokuthi yikho okuqala ukulolonga intshantshu zakusasa.
“Abadala bathi sigoqwa sisemanzi. Ukulungisisa ithalenta esilalo eZimbabwe kumele kwenziwe ezikolo. Umntwana olesiqubu kumele abonakale esakhula.
“Ababalisi labo sibakhuthaza ukuthi bakhwabithe ukuthola izithupha zomdlalo wokugijima. Kunengi osekuguqukile kulumdlalo njalo ithalenta labantwana lifuna ukukhwezelwa ngolwazi. Nxa sesincedisa njengeBulawayo Athletics Board, sikhangelele ukuthi uhlelo lolu lukhulise umdlalo, ulwazi lwababalisi lethalenta labantwana.”
Kusenjalo isabelo sakoBulawayo sikhethe abantwana abangamatshumi ayisithupha abazagijimela lesisabelo kumbuthano ozabakhona mhlaka 18 kulinyanga edolobheni leKwekwe.
UBongani Sibanda umgcinisihlalo weNational Association of Secondary Heads utshele uMthunywa ngoLwesibili ukuba iqembu labantwana bakoBulawayo lizangena enkambeni yokulolonga kusukela ngoMvulo.
“Abantwana abazagijimela iBulawayo baphume kuntshantshu lezo ezikhokhele kumncintiswano ebidibanise iziqinti esilazo. Ithimu le ikhethwe kuziqinti zeBulawayo Central, iKhami, iReigate, iMbizo leMzilikazi.
“Kusukela ngoMvulo, kuzalungiselelwa umncintiswano wezabelo. Inkundla yeWhite City izasetshenziswa ukulolonga abagijimayo kuthi abadlali bePhysical Education bazalungiselela esikolo seMalindela,” kutsho uSibanda.
Kulimpelaviki inhlanganiso yeBulawayo Athletics Board iqoqe imijaho lemidlalo yokweqa lokujika enkundleni yeWhite City. Imincintiswano le ngeyesithathu kulumnyaka.
