uMthunywa
KULEZINSUKU kukhanya ezomculo ziqhubekele phambili nanko phela amaqembu ezomculo lokhu esanda ngamandla kuleli. Angithi nje kule iviki iphephandaba likazulu liphethe iDupute Warriors iqembu lerhumba elingena kuzwakale. Kalitshayi nje leliqembu lenza izimanga.
Ezinambithekayo ngaleliqembu zizavezwa yingxoxo le ejulileyo phakathi kukaMqondisi waleliqembu uGibson Sidambe (GS) kanye lentatheli yephephandaba likazulu uCornelius Luphahla (CL).
CL: Umphakathi uthanda ukwazi mayelana lembali yeqembu lenu kanye leyakho njengomunye wabaholi balo.
GS: Mina ngakhulela esigabeni seMphakama eNkayi lapho engasuka khona sengisiyadinga umsebenzi kweleSouth Africa okuyikho engahlangana khona labafowethu esisonke kuleliqembu. Ngemva kokulisungula eliqembu ngo2014 saqala-ke ukukhipha amadlalade minyaka yonke.
CL: Njengeqembu eliculayo licula libangaki njalo abanye bakho badabuka ngaphi?
GS: Eqenjini sibahlanu kodwa mina kangiculi ngisebenza ukuncedisa ekusunguleni ingoma kanye lekubeni ngumqondisi weqembu. Abaculi abacula kuleliqembu nguGreyton Tshuma odabuka esigabeni sakoMakhulela ePlumtree, kube loThobani Dube, Millicent Dube kanye loZakata Mkhubazi abadabuka esigabeni seDupute ePlumtree.
CL: Lokhe laqala ukucula selakhipha amadlalade amangaki mfokaSidambe?
GS: Njengeqembu elisanda kusungulwa sesakhipha amadlalade amathathu. Elakuqala salikhipha ngo2014 njalo lithi Uqoph’ukuqopha, kuze elika2015 elithi Sasidlen’indlebe sacina ngelika 2016 elithi Vuma.
CL: Landise ukutshayela ngaphi ingoma zenu njengeqembu lerhumba?
GS: Ingoma zethu sivame ukuzitshayela emikhosini etshiyeneyo egoqela amadili okuzalwa kanye lemitshado kumbe eminye njalo imidlalo eminengi. Siyake njalo sitshayele ingoma zethu kuma-shows kodwa ama-shows la sivame ukuwenzela khonapha kweleSouth Africa kuphela.
CL: Abantu bathini ngomsebenzi wenu njalo likhangelele ukubenzelani?
GS: Abantu bayawuthakazelela kakhulu umsebenzi wethu, basikhuthaza ukuthi siqhubekele phambili ngomsebenzi wethu sibajabulisa singadeli. Ngalokhu thina sikhangelele ukuqhubekela phambili sibajabulisa ngengoma zethu sibatshengisa ukuthi lathi siyakuthakazelela ukusemukela kwabo ngothando.
CL: Akutsho jaha ukuthi lizavakatshela nini kwelakoMthwakazi lisiyajabulisa uzulu njengoba lidabuka khona.
GS: KwelakoMthwakazi sizavakatshela khona siyejabulisa uzulu noma nje singakahleli ukuthi sizahamba nini ngenxa yokuthi sihlala sibambekile. Ukungabavakatsheli lokhu akutsho ukuthi siyabalibala kodwa siyabakhumbula yikho sizahlela ukuthi sibavakatshele. Noma kunjalo umculo wethu uyatholakala kwelakithi ngoba nxa sithe sayafika khona siyabaphathela.
CL: Bunzima bani eliyake lihlangane labo njengeqembu njalo nkuthazo bani eliyipha abaculi abasasungula?
GS: Ubunzima esiyake sihlangane labo yikuswela imali yokuzithuthukisa kanye lokuthi abantu bayasintshontshela umculo wethu bawuthengise ngentengo ephansi okudala ukuthi nxa sesithengisa owethu kube nzima ukuthi uthengwe ngendlela esijabulisayo.
Kubaculi abasasungula ngithi kabaqhubekele phambili becula njalo kabasebenzise iziphiwo zabo babuye njalo bahloniphe uzulu ukuze bathuthuke.
