uMthunywa
Mthokozisi Dube
ZIPHAKATHI komhlane lembeleko izikolo zeNkayi kulandela ukuphathiswa ngesipho samabhuku nguMnumzana Jabulani Hadebe oyinzalo yakule indawo.
Isipho lesi esamabhuku (mini library) kubikwa siqale esikolo seTshanke, eGuwe Primary leSecondary, eGwitshi Primary leSecondary eSt Thomas kanye leHompane njalo kukhangelwe ukuba lezinye izikolo ezikule indawo zithole amabhuku la.
“Ngibone kuqakathekile ukuba ngixhase uHulumende emizameni yokuthuthukisa ezemfundo kulandela ukuthi ilizwe lethu ngelinye lamazwe alezizalwane ezifundileyo.
“Kungakho ngizizwe ngilomlandu wokuthi ngiphe isipho samabhuku kulezi izikolo kulokuthi ngiwagcine,” kubika uMnu Hadebe.
UMnu Hadebe ubike ukuba amabhuku la wawatholiswa ngabangane bakhe abangaphandle kwelizwe kungakho yikho laye esedlulisela phambili lesi isipho esikhangelelwe ukunceda isigaba.
“Ekupheni kwami isipho lesi ngikhangelele ukuthi umphakathi lawo uphathiseke ikakhulu labo abangatholanga ithuba lokuya esikolo ngenxa yezizatho ezithize,” kuchaza uMnu Hadebe.
UMthunywa ubikelwe ukuba izakhamizi zizenelisa ukweboleka amabhuku la ezikolo lezi njalo ngawomuntu wonke.
UMnu Hadebe uqhubekele phambili ebika ukuba imizamo alayo ngeyokuthi isiqinti seNkayi sithuthukiswe yikho nje esithi konke akutholileyo akwedlulisele ezakhamizini.
“Ezinye iziqinti esithi zithuthukile ziphakamiselwa phezulu ngabantwana abaphuma kuleyondawo kungakho kumele sithathe isibonelo kulokho lathi sikhumbule izikolo esiphuma kizo,” kubika uMnu Hadebe.
UMnu Hadebe uqhubekele phambili echaza ukuba ukhangelele ukuthi kusiya phambili amabhuku lawa ahlaliswe ezakhiweni ezilobulembu njengalokho kulezi insuku sokufundwa ngobulembu.
“Nxa sikhangele umntwana osekhaya usemuva ngoba engenelisi ukuthola indawo yokufundela elobulembu bokumncedisa ezifundweni zakhe kungakho ngikhangelele ukuthi sincedise izikolo zakithi kulokho,” kubika uMnu Hadebe.
UMnu Hadebe uphethe ngokubika ukuba uzaphathisa njalo abalesifiso sokucula ukuba bacindezele ingoma zabo ngoba kulapho okufela khona amathalenta abo. — k.com
