uMthunywa
YiNtatheli kaMthunywa
INKEZO yeChibuku Super kumdlalo kanobhutshuzwayo izathathwa yithimu elabadlali abomileyo.
Kulimpelaviki amaqembu ayisitshiya galombili angena enkundleni ewomile, inhloso kuyikulwela ukunqoba kuhlandla lama-quarter final enkezo le.
Umqhudelwano lo udibanisa iHow Mine, Triangle, Harare City, Ngezi Platinum, Highlanders, FC platinum, ZPC Kariba leTsholotsho
NgoLwesibili inhlanganiso yePSL ibambene labaqoqi benkezo benze i-draw eyiyo ehlele ukuthi ithimu ngethimu izadlala njani.
Ekuhleleni kwamaqembu, izimbamgodi zeHow Mine zidibaniswe labomakhelwane iHighlanders enkundleni yeBarbourfields. Amaqembu la awaqali ukuhlangana kusigaba senkezo njalo akwaziwa ukuthi yiphi engephula eyinye.
Umdlalo lo yiwo wodwa ozabe ukoBulawayo.
Intshantshu zenkezo le ngo2015 iHarare City zilakho ukuthola ubunzima ezandleni zeZPC Kariba. Abadlali bakaMoses Chunga badinga ukuqiniswa nxa belesifiso sokudlula kalula kubungcitshi beZPC Kariba eqeqetshwa nguSunday Chidzambwa.
Kweminye imidlalo, iTsholotsho idonsa umango iqonde enkundleni yeBaobab lapho ezadibana leNgezi Platinum.
Zonke zivuse amehlo abasekeli bebhola ngoba kungamaqembu asacathula kunguqu yaphezulu.
ITriangle izobe isekhaya mhla isamukela abakhokheli beligi yeCastle, iFC Platinum.
Iqembu elizakuba yintshantshu yeChibuku Super Cup lizamela isizwe kumqhudelwano yeCaf Confederations Cup ngomnyaka ozayo.
Nansi imidlalo yeChibuku Super Cup:
NgoMgqibelo: ZPC Kariba v Harare City (Nyamhunga), Ngezi Platinum v Tsholotsho (Baobab).
NgeSonto: How Mine v Highlanders (Barbourfields), Triangle v FC Platinum (Gibbo).
