uMthunywa
Msilisi Dube
INHLANGANISO yeVeterinary Services isicebise abalimi besabelweni seMatabeleland South ukuba balimuke umkhuhlane we-botulism obangela ukugogeka kwezifuyo okungabangela ukuthi zife.
Kubikwa abalimi bayekela izifuyo zisidla amathambo enyamazana ezafayo egangeni okuyinto ecina ibangela ukuba zithole umkhuhlane lo.
UDokotela Mtshena Sibanda, owenhlanganiso le ubikele iphephandaba likazulu ukuthi umkhuhlane lo ulethwa yizibungu okuthiwa yi-clostridium botulinum.
“I-botulism ibangelwa ngumutshana ovela kuzibungwana okuthiwa yi-clostridium botulinum.”
Umkhuhlane lo uvame endaweni zelizwe ezilotshani obumila emhlabathini ongela-phosphate.
“Ukusilela kwe-phosphate le kubangela ukuthi izifuyo lezo zidle okudlulisileyo besezicina zisidla kumbe zikhotha amathambo enyamazana ezafayo. Indawo ezinjengeMatabeleland South kulapho okungaqhamuka khona umkhuhlane lo ngoba ukudla kwezifuyo kuvame ukusilela.
“Amathambo la kubikwa ayabe elemputshana (toxin) etshiywe ligcikwane le-botulism,” kuchaza uDkt Sibanda.
UDkt Sibanda uqhubekele phambili wachaza ukuthi ngemva kokudla i-toxin le inkomo ilakho ukuhlala amalanga amabili kusiya kwayisithupha ibisiqala ukugogeka inyawo zangemuva.
“Kunzima ukutsho ukuthi inkomo ilomkhuhlane we-botulism kodwa abalimi kumele bahlolisise umhlabathi wendawo yabo ukuze bazi ukuthi ule-phosphorus eyeneleyo ukwenzela ukuthi inkomo zingacini zisidla amathambo.
“Okunye abalimi okumele bakwenze yikukhangelisisa inkomo zabo nsukuzonke ukuze benelise ukuzibona masinya nxa sezigogeka inyawo zangemuva kumbe zisehluleka ukudla ngoba yiyo kuphela indlela engabaphathisa ukuthi bawubone lumkhuhlane,” kucebisa uDkt Sibanda.
Uphethe ngokuchaza ukuthi azikho indlela zokwelapha umkhuhlane lo ngakho abalimi kumele bewenqabele ngokuhlabisa inkomo ikakhulu endaweni ezicatshangelwa ukuthi zilomkhuhlane lo. Uthe kuyadingeka njalo ukuqondisa ukusilela kwe-phosphate ngokufaka i-calcium kumbe i-phosphorus ekudleni kwenkomo.
