uMthunywa
Ncekwenhle Ncube
ZIKHALA ezimathonsi izakhamizi zeJambezi eHwange kulandela ukulahlekelwa yizifuyo zazo ezidliwa yizilwane nsukuzonke.
Uhlupho lolu osolulesikhathi lwaqalisa luqale phansi kutsha ngoNhlolanja nyakenye lapho ezidle inkomo ezedlula amatshumi amabili.
Ekhuluma lentatheli uMnumzana Sipho Ncube ubike ukuthi uhlupho lolu lwezilwane selulesikhathi lwaqala njalo sebedlelwe izifuyo zabo ezinengi.
“Luhlupho olulesikhathi lwaqala okungafika iminyaka emithathu. Sesike sazama ukuthi udaba lolu silubikele abeNational Parks and Wildlife kodwa asikaluboni usizo lwabo.
“Inkomo zethu azisayi emadlelweni sezidlela khonapha eduze lasekhaya. Inkomo ingavele iphume kwezinye ingene igusu ayisaphenduki. Inkomo zethu seziphelile ngenyamazana lezi esingakwaziyo lokuthi zavela ngaphi,” kulandisa uMnu Ncube.
Ubuye njalo wachaza ukuthi abantu sebesesaba ukuhamba egangeni nxa izifuyo zabo zithe zayadlela khatshana nanko phela omunye umama weMande walinyazwa yisilwane ngomnyaka ophelileyo.
Esinye isakhamuzi esiziveze ngokuthi nguNkosikazi Nokuthaba Moyo ubikele iphephandaba ukuthi abantu sebesesaba lokuhamba bekhululekile endaweni engeyabo.
“Indawo ngeyethu kodwa sesisesaba lokuhamba kuyo. Abantu bakhala njalo nje ngezifuyo zabo ezidliwayo. Umnyaka wonalo uqalisile nje kulenkomo ezine ezicatshileyo esileqiniso lokuthi sezidliwe kudala.
“Sicela uhulumende angenele asincedise ngokudubula izilwane lezi ngoba sezixhwalile vele kumbe njalo nxa kuvuma zibanjwe ziyevalelwa,” kukhalaza uNkszn Moyo.
Usobhuku wakule indawo uNkosikazi Alice Ncube uthe kuliqiniso sibili ukuthi bahlutshwa yizilwane njalo uhlupho lwakhona lukhanya lulokhe luqhubeka lusiya phambili.
“Izilwane sezisiqedele izifuyo zethu. Kwesinye isikhathi uthola ngemlenze sezidle zasutha kumbe inhloko.
“Inhlanganiso ezibona ngenyamazana zasendle sesizame saze sabeka phansi izandla. Bayabuya bekhange khangele bethi bazaphenduka behambe unompela.
“Asisakwazi lokuthi senzeni. Abantu sebesenza okokuthengisa inkomo zabo ngoba besesaba ukuphelelwa yizifuyo zabo,” kutsho uNkkz Ncube.
