uMthunywa
Ethel Ncube
ZlPHAKATHI kwetshe lembokodo izakhamizi zakuWadi 13 eNyamandlovu kulandela ukusilela kwezikolo endaweni le osokubangele ukuthi impumela yemihloliso ibephansi ngoba abafundi behamba umango omude besiya esikolo okwenza bafike sebediniwe.
UMthunywa uzwe ukuthi endaweni le kudingakala ukuthi kwakhiwe izikolo zemfundo yaphansi ezintathu kanye lesemfundo yaphezulu esisodwa ukuze abantwana bengahambi umango omude besiya esikolo.
Intatheli ixhumane loMnumzana Victor Mlotshwa oyisakhamuzi sakule indawo oveze ukukhathazeka kakhulu ngokuswelakala kwezikolo okwenza abafundi bahambe umango ongamakhilomitha phose angu-20 besiya esikolo.
“Silohlupho olukhulu lokusilela kwezikolo lapha ngoba sazi ukuthi ilifa lomntwana wonke yimfundo kodwa lapha kithi abantwana abanengi kabafundi kuhle ngoba behamba umango omude kakhulu besiya esikolo.
“Abantwana bemfundo yaphansi bahamba amakhilomitha angu-15 nsukuzonke besiya esikolo bona bebancinyane okwenza bacine besekela isikolo kuthi abanye bafunde sebekhulile,” kutsho uMnu Mlotshwa.
Uqhubekele phambili echaza ukuthi labo okumele benze iEarly Childhood Development eyaziwa ngokuthi Grade 0 bacina bengenelisi ukuya esikolo ngesikhathi esifaneleyo.
“Umntwana oleminyaka emine kunzima ukuthi ahambe amakhilomitha amanengi esiya esikolo. Abazali bacina bebona kungcono ukuthi babahlalise bahambe sebesiya kugwalo lwakuqala kumfundo yaphansi okubisela emuva intuthuko yomntwana ekufundeni ngoba eseqe esinye isigaba.
“Sicela ukuncediswa sakhelwe izikolo loba nje ezintathu endaweni ezemfundo yaphansi ezimbili lesemfundo yaphezulu esisodwa,” kubika uMnu Mlotshwa.
UMthunywa uxhumane lomlisa wakule indawo uMnumzana Tshakalisa Ncube ochaze ukuthi ngempela balodubo lokusilela kwezikolo.
“Abazali bathwele amagabha avuzayo ngokudingela abantwana ukudla nxa sebesiya funda kwezinye indawo.
Abemfundo yaphezulu bahamba umango ongamakhilomitha afika phose 31 besiyafunda okubangela ukuthi bafike bediniwe bengenelisi ukuthi baphume lempumela enhle ezifundweni.
“Kukanti abantwana abangamankazana bacina bemitha ngokuhamba umango omude ngoba umzali uyabe elokhe ethi uyesikolo kanti uqonda ejaheni aphenduke engafikanga esikolo. Kukanti nxa isikolo siseduze kunzima ukuthi bacatshe nxa besiyakhona. Sidinga ukusizwa ngempahla yokwakha ngoba siyenelisa ukuthi sizakhele njengezakhamizi ukuze abantwabethu bathole ilifa elingcono,” kuphetha uMlisa uNcube.
