uMthunywa
Ncekwenhle Ncube
KULOMFUNDI weMidlands State University (MSU) omiswe phambili kwenkundla yeTredgold ngoLwesibili kuyonale iviki esetheswa icala lokuzama ukutshontsha impahla esitolo sakoJet koBulawayo esebenzisa incwadi zamanga.
Umsolwa uLizwe Dube oleminyaka yokuzalwa engu-20 oyenza izifundo zePolitical Science ekolitshini ye-MSU kubikwa wasebenzisa isithupha samanga ukuthenga izigqoko ngesikwelede ngeviki ephelileyo kodwa abesitolo lesi benelisa ukumbamba okuyikho okwenza wabotshwa.
Umtshutshisi kulelicala uMnunzana Taurai Hondoyemoto uchaze ukuthi ngeviki edluleyo umsolwa wasebenzisa incwadi yokuzalwa etshintshwe imbhalo eqondileyo ngenhloso yokutshontsha impahla esitolo lesi.
Inkundla ibuye yabikelwa njalo ukuthi ngomnyaka ophelileyo umsolwa wenza futhi icala elifanayo kwesinye isitolo esingaqanjwanga koBulawayo.
Umsolwa usolwa ngamacala amabili elokutshintsha okubhalwe ngokusemthethweni lokuzama ukuthatha impahla esitolo lesi ngobugwelegwele.
Ebuzwa ngumantshi ngecala abeletheswa umsolwa uvumile wasecela inkundla ukuthi ingamuphi isigwebo esilakho ukuphambanisa izifundo zakhe.
Umantshi uNkosikazi Evelyn Mashavakwe ugwebe umsolwa ukuthi abhadale imali ebiza amadola alikhulu kungakapheli inyanga kaNtulikazi.
Umantshi uphinde waxwayisa umsolwa ukuthi angaphindi enze icala elifanayo ngoba engasoze aphinde axolelwe.
