uMthunywa
KULOWESILISA oyisizalwane seMalawi ovele emthethwandaba kulandela ukutholakala koholokoqo lwenyoka esikhwameni sakhe esigodlweni seHarare.
Kubikwa ukuthi uJafali M’Mbwana weMangitsho Township esigabeni seMalombe khonale eMalawi uveze ukuthi ubesedlula nje kweleZimbabwe eqonde kwele South Africa lapho akade efuna ukuyanika enye inyanga yakhonale linyoka.
UM’Mbwana ubekwe icala lokwephula i-Immigration Act leParks and Wildlife Act ngesikhathi evela emthethwandaba ngoLwesihlanu.
Uwavumile amacala awetheswayo. umantshi uMnumzana Elijah Nkomo wamgweba izinsuku ezingu-20 esejele.
Lesi kube yisigwebo esilengisiwe ngombandela wokuthi uzobuyela kwelakibo ngokuphangisa.
Umthethwndaba uzwe ukuba mhlaka 1 Nkwenkwezi emini kulepholisa lenkambeni yeHarare Central elabona abantu bebuthene eRoad Port lathi lisondela eduze labona abantu laba begombolozele uM’Mbwana.
Ipholisa leli lathi lithi mehlo suka lananzelela ukuba umsolwa wayelenyoka yohlobo lweCobra phakathi kwesikhwama sakhe okwabangela ukuthi limbophe.
Ekufikeni kwabo enkambeni yamapholisa umsolwa wacelwa ukuba avule isikhwama sakhe lakanye wasivula kwavela inyoka yakhe.
Umtshutshisi walelicala uthe amapholisa afumana njalo ukuthi umsolwa wayengelayo iphasipoti kungakho-ke lelo kwaba ngelinye icala. Inyoka kamsolwa yasiwa kwabogatsha olubona ngezenyamazana zendle iNational parks and Wildlife bona abathi inyoka le ibiza imali engange $100. — Ubulembu
