uMthunywa
YiNtatheli kaMthunywa
NXA ekhona amadoda azitshela ukuthi aqine ukwedlula amanye, kungangcono angene umdlalo we-body building, aqale ukuzibonakalisa kumncintiswano ka-Mr Bulawayo.
Lo ngumbono kaSimon Gama, unobhala wenhlanganiso ye-Body Building Bulawayo, obike ngokuthaba ukuphenduka komdlalo lo, ngemva kweminyaka emithathu ungekho, uvinjwe ngumkhuhlane we-Covid 19.
UGama uthe ukuza komncintiswano ka-Mr Bulawayo kuzavulela amadoda aphatheka kulumdlalo amathuba wokuthi azitshengisele, aphinde athole udumo olulakho ukubafikise phetsheya, baguqule impilo zabo.
Umncintiswano lo, ongaphansi kwekhalenda ye-National Federation of Zimbabwe Body Building and Fitness, obizwa ngokuthi yiBulawayo Bodybuilding Championship, uzaqhutshelwa enkundleni ye-Amphitheatre mhlaka 29 Mfumfu, ngokutsho kukaGama.
UGama ujabule kakhulu ngokuthi umdlalo lo usuzabuyela edolobheni ngemva kwekhefu elide.
“Khathesi sibuyile njalo sizaqhuba umncintiswano kaMr Bulawayo,” kutsho uGama.
Uthe wonke umuntu ozizwa elentshukuntshu yokuncintisa, uvunyelwe.
“Kuvulelwe wonke umuntu koBulawayo, sifuna umbukiso lo ubemkhulu.
Inhlanganiso yeBulawayo Bodybuilding iphakathi kokuxoxisana lenye yamankampani kulelidolobho ukuze umncintiswano kaMr Bulawayo uthole usekelo.
“Sizabika ukuthi simi ngaphi kulezo ingxoxo kodwa sitshisekela ukuba umncintiswano wethu ubemkhulu, nanko uphenduka ngemva kweminyaka emithathu Sizakwethula okunengi ngeviki elizayo,” kutsho uGama.
Kusenjalo, unobhala we-National Federation of Zimbabwe Body Building and Fitness, uGivemore Marume uthumele iphephandaba likazulu umbiko wokuthi akunjabulo eyedlula le, eyokuzwa ukuthi imncintiswano yabo isiphendukile.
“Ezemidlalo ziyimpilakahle yethu sonke njengabantu ngakho ukuzwa ukuthi sesiphendukile enkundleni kuyathokozisa kakhulu,” kutsho uMarume.
Abaqoqi bakaMr Bulawayo sebefake ingqobe emadodeni akulelidolobho nanko kuzanxuswa lalabo abahlala phandle kwakoBulawayo ukuthi bancintise.