uMthunywa
Charity Moyo
IZAKHAMIZI zeMberengwa ngaphansi kwenduna uChizungu zikhala ezimathonsi ngobugwelegwele obenziwa yinduna kanye lomlisa esigabeni sabo, uMthunywa ukuzwile lokhu.
Kuzwakale ukuba induna le kanye lomlisa wayo uMoses Chivhanga ithwalise izakhamizi amagabha avuzayo okuyikho osokubangele ukuthi inengi elakhele esigabeni lesi lifise lokuthutha.
Kubikwa umuntu ofelwa ngumntwana ogcinwe komalume uyahlawuliswa inkomo yinduna le ukuthi angcwatshwe esigabeni sakhe.
UMthunywa uzwe ukuthi umthetho lo usuthwalise izakhamizi nzima ikakhulu lezo ezigcina izihlobo zazo nanko phela nxa leso sihlobo singafa kumele kuphume ehambayo esibayeni ukuze lowomuntu abekwe.
Umfakazi obikele uMthunywa uMnumzana Tinomutenda Mhofu uveze ukuthi induna yesigaba sabo kayivumeli ukuthi umuntu ongazalwa kulesisigaba angcwatshwe kiso kungakhathalekile ukuthi ukhulele khona kumbe hatshi.
“Siyakwazi ukuthi indawo zonke umuntu kabekwa lapho angazalelwanga khona kodwa uhlupho esilalo yikuthi umntanami oyinkazana engaba lomntwana ongelayise induna ithi kumele ngihlawule inkomo ukuze lowomntwana abekwe.
“Pho lowomntwana uyabe engowangaphi njengoba wazalwa wakhulela esigabeni sethu. Kambe kuqondile yini lokhu,” kutsho uMnu Mhofu.
Intatheli ixhumane lesinye isakhamuzi sakule indawo uNkosazana Chipo Shoko owake wawelwa ludubo induna yamhlawulisa inkomo.
Uveze ukuthi kwababuhlungu ngoba wayelahlekelwe ngumzukulu wakhe owayezalwa ngumntwana oyinkazana, wabizwa enduneni wahlawuliswa inkomo ngoba kuthiwa kakwaziwa kibo.
“Kubuhlungu ukuthi ulahlekelwe kulokuthi abantu bekukhalele bona babe sebesithi umuntu kahlawule.
“Ngafelwa ngumntanomntanami ngenyanga kaNkwenkwezi kuwonalo umnyaka, wazalwa wakhulela lapha ekhaya, umama wakhe wabhubha engavezanga ukuthi umntwana lo wayezalwa ngaphi.
“Ngokunjalo samkhulisa njengomntwana, kuthe esegule ephetsheya wabuya ekhaya kwasokumkhulela wabhubha.
Ngakhitshiswa inkomo ngoba besithi kaziwa kibo kutsho ukuthi kasuye walapha esigabeni,” kuveza uNkszn Shoko.
UMthunywa uxhumane loSenetha wezinduna esigabeni seMberengwa uMnumzana Zama Mkhwananzi yena oveze ukuthi indaba ezinjalo ziyahlupha ngakho zifuna yena azikhulumele ngoba imithetho iyatshiyana.
“Imithetho iyatshiyana ngendawo kumbe ngumthetho wabo abakoChizungu, kufuna yena azikhulumele,” kutsho uSenetha Mkhwananzi.
Inombolo zocingo lwenduna uChizungu bezingangeni.
