uMthunywa
AMAQEMBU kaDivision One azadlala ekhululekile kulisizini ngoba asemanengi amankampani asedonselana ukusekela inkezo zeligi evulwa kulimpelaviki.
Iqula elikhokhela iligi le emhlubulweni ongezansi yelizwe libika ukuba wonke amaqembu abo alitshumi lanhlanu azaqala imidlalo yayo ngoMgqibelo lapho okukhangelelwe ukuthi kuvuthiswe inkundla zeligi le engaphansi kwenhlanganiso yeZimbabwe Football Association.
Isizini iqalisa kusilela iqembu elilodwa kulandela ukutshiya umdlalo okwenziwa liqembu leTechnosphere lona elakhetha ukuba likolitshi lenguqu yabasakhulayo kulumnyaka.
Umgcinisihlalo weZifa kumhlubulo ongezansi yelizwe uMusa Mandaza wazi ukuba isikhala esitshiywe yiTechnosphere sizavalwa ngeyinye ithimu ezabikwa emphakathini kunsuku ezilandelayo.
“Isizini yeZifa kusabelo esisezansi yelizwe iyaqala ngoMgqibelo. Amaqembu wonke asenikezwe uluhlu lwemidlalo njalo sekulindelwe ukuthi kuvulwe inkundla.
“Siphakathi kokuxoxisana lalabo abathembisa ukusisekela kodwa okuthabisayo yikuthi zonke inkezo zikhona lonyaka.
Kuligi le, usekelo oluphezulu luvela kusomabhizimusi uKenneth Mhlophe osekela umvuzo womdlali ohlohla ukwedlula abanye inyanga zonke.
Ekhuluma lephephandaba likazulu ngoLwesibili, uMhlophe uthe uzanikeza umdlali ozahlohla amabhola afika angu-22 umvuzo wemali ekupheleni kwesizini.
Uthe ukhathazekile ngokuthi inani lamabhola ahlohlwa ngabagadli bamathimu liphansi ngakho ukubone kulicebo elihle ukuthi akhuthaze abadlali ngomvuzo wemali angange-$300.
“Umdlali ozafikisa amabhola angu-22 ngizamnikeza i$300. Ngikhethe ukwenza lokhu ngoba ngilomqondo wokuthi ngifake abafana ingqobe yokuthi bahlohle amabhola amanengi. Inkampani yeNokel Security ilokukholwa ukuthi kulethalenta elikhulu kubhola likaDivision One kulumhlubulo njalo ithalenta leli kumele lisekelwe.
“Ngokunjalo sizaqhubeka siletha imivuzo kulabo abadlali abenza kuhle.Kuqakathekile ukuthi inguqu yeligi le isekelwe ukuze abadlali benelise ukuthi baziphakamise baphinde bakholisise lababukeli,” kutsho uMhlophe.
Kusenjalo, kuluhlu lwemidlalo yakuqala iBosso 90 idibana leBulawayo Chiefs enkundleni yeWhite City.
Ukuswelakala kweqembu elizangenela iTechnosphere kutsho ukuba iqembu leMakomo FC alisoze lidlale ngeviki yokuqala. Amaqembu azadonsa amehlo abalandeli abalisa lawo achinsa ukudlala ezikwakweni zikaDivision One iZim Leopards, iMotomoto, iMosi Rovers leChiwororo.
IZim Leopards ihlelwe ukuthi ingqikilane leNdlovu iyanyathela eBrady Barracks, iMotsi Rovers eyeFolosi izangena umango isiya koBulawayo ilande ukuyachumisa iChiwororo.
Imidlalo yonke ngokugcweleyo:
Kusasa: Bosso 90 v Bulawayo Chiefs (White City), Black Boots v Casmyn (Fairbridge), ZPC Hwange v ZRP Bulawayo (Ingagula), Amagagasi v Talen Vision (Chinotimba), Chiwororo v Mosi Rovers ( 12PM White City), Indlovu Iyanyathela v Zim Leopards ( Brady Barracks).
NgeSonto: Victoria Falls Tigers v Motomoto ( Chinotimba).
