uMthunywa
Ncekwenhle Ncube
BAYADELA abazali abalabafundi abaqeqetsha ezikolo zeBubi njengoba sebewelwe yinhlanhla yamaSwazi yokwakhelwa izindlu zokufundelwa ngumeli wedale lephalamende.
Loluhlelo lusungulwe ngumeli wedale lePhalamende uClifford Sibanda ngomnyaka odluleyo ngenhloso yokuthuthukisa imfundo yemaphandleni. Lokhu kuzabaphathisa ukuthi baqhubekele phambili bafike emakolitshini.
Usizo lolu luze ngesikhathi lapho umeli enanzelele ukuthi izikolo ezinengi eBubi zilezindlu ezingenelanga okungaba ngezinye zezizatho zokuthi abantwana bengenzi kuhle.
Iphephandaba lixhumane lomeli uKhomuredi Sibanda yena okubeke sobala ukuthi indawo yeBubi ibisilela kakhulu ngezindlu zokufundela okwenza abantwana bezonde isikolo abanye batshiyele endleleni.
Uqhubekele phambili esithi yena lehofisi yakhe basebenze nzima ukudingela izikolo lezi usizo. Kungakho-ke zonke izikolo ezizuze usizo lolu ziphiwa imali engange$20 000 ukuncedisa ukwakha izindlu zabo.
“Ngike ngahambahamba ezikolo lapha ngihlola ukuthi abantwana benzanjani ngoba imiklomelo yabo ibingathi ayijabulisi ekupheleni kweminyaka edluleyo. Kungakho-ke ngananzelela ukuthi ukusilela kwezindlu zokufundela kuyinkinga enkulu kakhulu.
“Ngikhuluma nje kulezikolo ezifika isikhombisa ezizathola usizo kuhlelo lolu. Zonke ziyakhelwa indlu yokufundela eyodwa lendlu yababalisi eyodwa,” kuchaza uKhmrd Sibanda.
Iphephandaba lizwe ukuthi ezinye zezikolo ezinjengeBattlefield abantwana bebefundela phandle obekusenza kubenzima ukuya esikolo ngesikhathi sezulu kanti nxa ligwaze umhlaba bebelandelela umthunzi kuthi ngesikhathi somqando kubenzima njalo.
Umphathisikolo wesikolo seSomvubu Secondary uMnumzana Khumbulani Sibanda uchazele iphephandaba ukuthi bawelwe yinhlanhla ukuthi labo babengabanye abancediswe ngumeli ukuze bazuze usizo lokwakhelwa indlu yokufundela.
Kuzwakele ukuthi uhlelo lolu okwalesi isikhathi belusaqonde izikolo zemfundo yaphezulu kodwa ngokuya kwesikhathi lezemfundo yaphansi zizaluzuza uncedo olufanayo.
