uMthunywa
Ncekwenhle Ncube
BAKHALA zome abazali besigabeni seMlomoliwoto, eSigodini ngenina eselihluphile ngokupheka ithothotho liyithengisela intsha okubikwa idakwa ize ilale khona, uMthunywa uyakuveza lokhu lamhlanje.
Inina leli uNkosazana Esther Hadebe odume ngokuthi nguNakaFarayi kubikwa upheka ithothotho eyiyo esitshona inkunkuluzwa yintsha kulesi isigaba.
Esinye isakhamuzi esithande ukuvezwa ngokuthi nguNdlovu nje kuphela sibikele intatheli ukuthi intsha iqalisa ukudakwa isasencane.
“Umama lo kade waqalisa ukupheka ithothotho. Abantu benza sengathi abamboni ngoba abanengi bayithenga kuye.
Manje okubuhlungu yikuthi okungabafana okuncane okufundayo lakho sokuyithenga kutshone kudakwa.
“Angikhulumi ngeKhisimusi abafana babedakwe bengokunye. Saze salamula abanye sebefuna ukulwa bethembisana lokugwazana ngengqamu.
“Nxa amapholisa engasincedisa ngokusibophela umama lo ngoba usibulalela abantwana bethu,” kutsho uMnu Ndlovu.
Esinye njalo isakhamuzi sakule indawo uSihle Ncube uthe ikusasa yentsha isifiphala ngenxa kamama lo oyithengisela utshwala.
“Asazi ukuthi sithini kodwa njengabazali sikhathazekile ngekusasa labantwabethu ngoba abanye lesikolo kabasayi sebetshona ekunatheni ithothotho leyo.
“Sicela abomthetho basiphathise babophe umama lo,” kutsho uNcube.
Ekhuluma lentatheli kaMthunywa uMnumzana Elliot Ncube ongusobhuku wakule indawo uthe udaba lolu bazaluhlalela phansi bebone okokwenza.
“Izakhamizi ziyakhala mayelana lokuphekwa kwethothotho sibili, sesikuzwile lokho. Sizahlala phansi njengenkokheli zesigaba sibone inyathelo esingalithatha.
“Izinto ezifana lalezi asifisi ukuthi zenzeke esigabeni sethu ngoba kusikhupha isithunzi. Lolu ludaba esizalubikela ubaba ukhansila ukuze sincedisane ukulwisaneni lalokhu,” kutsho usobhuku uNcube.
UMnumzana Elijah Nkala ongukhansila kule indawo uthe udaba olunjalo alukafinyeleli kwezakhe indlebe kodwa uthembise ukuthi uzasukumela phezulu ukuze kuvikelwe intsha.
“Ikusasa yabantwana iqakathekile kubani lobani ngoba yibo inkokheli zakusasa. Lowo othalakala ephatheka ekutshabaliseni impilo zabo kumele ajeziswe.
“Okwakhathesi bengingakezwa lutho mayelana lalokho kodwa ngizachwayisisa ukuze nxa sithatha isinqumo sokujezisa sibe silakho okubambekayo okulicala okutshengisa ukuthi uthengisela intsha izidakamizwa ngokungekho emthethweni,” kutsho uKhansila Nkala.
Ebuzwa ngale indaba uNkszn Hadebe uphike wemba phansi ukuthi uthengisa ithothotho.
“Ngamanga aluhlaza tshoko ukuthi mina ngipheka ithothotho ngiyithengisele intsha. Abantu nje bayangizonda yikho sebengiqambela amanga,” kutsho uNkszn Hadebe.
