uMthunywa
Mthokozisi Dube
ZIMUNYU izakhamizi zesigabeni seShirville, eNyamandlovu kulandela isenzo somunye usobhuku esokudla izakhamizi izithende ngokuzithathela abafazi, uMthunywa ukuzwile lokhu.
Iphephandaba likazulu libikelwe yizakhamizi zakulo umango kuyonale iviki ukuba izakhamizi zidla amahabula ngosobhuku wakulindawo okubikwa ukuthi kaziphathanga nanko phela uhahabela abafazi babantu.
Usobhuku lo okuthikwa nguShadreck Mabone uthwalise izakhamizi amagabha avuzayo nanko phela sokulokungezwani phakathi kwazo ngenxa yakhe.
“Siphila phakathi kodaba olunzima olungaphenduka ngelinye ilanga lusibonise isidumbu phansi nxa umkaNaZibusiso okungelinye inina usobhuku lo ajola lalo engaphenduka evela eGoli,” kuveza esinye esale ukuqanjwa ngebizo.
UMthunywa ubikelwe ukuba usobhuku lo uvele kawuqali umkhuba wokungena abafazi babantu.
“Waqalisa enyenya lomama laye enyenya esiya kuye kodwa njengoba kungekho okufihlekayo ngothando sokusemthethweni noma nje kungekho emthethweni,” kuveza omunye njalo umfakazi uSipho Ncube ecingweni.
Umka NakaZibusiso, ovezwe nje ngokuthi nguMoyo kubikwa weza lemuli yakhe ezogcina umuzi wasuka waya eGoli esesiyadinga umsebenzi etshiya unkosikazi wakhe kulowomsebenzi wakhe wakuqala.
Kuzwakale ukuba kulapho usobhuku lo azibonela igcwalaguma ngoba laye ezihlalela yedwa, engathathanga.
“Esikwesabelayo yikubona isidumbu phansi ikakhulu emuntwini oyinkokheli owenza ihlazo elinje. Kambe uMoyo nxa engavuka ekhona kungazalwa nkomoni khonapha?” kutsho esinye njalo isakhamuzi esikhethe ukwaziwa ngelokuthi James Ngwenya.
Isakhamuzi lesi siqhubekele phambili sibika ukuba ukungathathi kwakhe lusobhuku yiso isizatho sokulandelela abafazi babantu.
Ekhuluma loMthunywa ecingweni ukuze atsho icele lakhe ngalolu daba usobhuku Mabone wale wemba phansi ukuba kulento enjalo eyenzakalayo.
“Mina ngizihlalele nje lomfana wami okhangele inkomo zami. Lokho okukhulunywayo angikwazi. Kungaba kuhle ukuba sizebonana mathupha ngoLwesine ukuze uzwe icele lami ngokugcweleyo,” kubika uMabone.
