uMthunywa
Johas Moyo
BAKHALA emini lebusuku abafana be-Old Luveve koBulawayo ikakhulu abafundi beMafakela leLuveve Primary ngojaha obadlisa imbuya ngoluthi ngokubabhinya, uMthunywa uyakuveza lokhu lamhlanje.
Kubikwa ujaha lo oleminyaka engu-15 kodwa olokhu ekubanga lemfundo yaphansi ubathwalele ubhulo abafana nanko phela usebhinye abafana abayisificaminwe mibili. Kucatshangelwa ukuthi abanye babo ubabhinya ngakibo, egangeni kanye le-paka ye-Old Luveve.
UMthunywa uzwe ukuthi ujaha lo ongazilisi isitho sakhe uzenzela umathanda kubafanyana afunda labo.
Ujaha lo ofunda eLuveve Primary kubikwa ubamba ngamandla abanye abafana abahlukuluze njalo abalayo uyabatshaya. Kuzwakale njalo ukuthi uselesikhathi eside engalugxobi ekilasini.
Abazali abamunyu ngesenzo somfana lo bathi kungcono ayevalelwa ejele umfana loanye abantwana.
“Abantwabethu sebethwele nzima ngomfana lo, kungcono bake bayemvalela ngoba izenzo zakhe zitshengisa ukuthi usexhwalile kakhulu,” kutsho umzali lo. Kubikwa ukuthi umetheswacala nyakenye ubehlukuluza kakhulu omunye umfundi weMafakela emtshaya, emthathele impahla aphinde amlandele ngakibo ayemenza umfazi ngakibo.
Esinye isakhamuzi selokitshini leli uMnumzana Liberty Nduku uchazele intatheli ukuthi yena sewabona umsolwa kanengi edonsela abantwana abangabafana epaka njalo ebatshaya okutshengisa ukuthi bayabe belwisana.
“Kuyangimangalisa okwenziwa ngumfana lo ngoba lesikolo kasahambi utshona ezula lapha edonsela abanye epaki njalo uyabatshaya nxa bengafuni ukulandela umthetho wakhe, kodwa into engimangalisayo yikuthi kungani engabotshwa njengoba sezwa ukuthi walala amalanga amabili kuphela emapholiseni waphenduka kodwa kusakhanya ukuthi kakaguquki ngoba ulokhe ebhinya abanye abantwana,” kutsho uMnu Nduku.
UMthunywa uzame ukukhulumisana labazali bomfana lo wezwa ukuthi kabakho uhlala logogo wakhe othe kazi lutho ngalokhu okukhulunywa ngabantu.
“Kangazi lutho ngalokhu okukhulunywa ngabantu ngokuganga komzukulu wami. Mina ngiyabe ngisithi nje uyadlala phandle labanye abantwana kodwa engikunanzelelayo yikuthi uyanyamalala isikhathi eside kakhulu aze abuye sekumnyama,” kutsho ugogo.
UMthunywa wenelisile ukukhuluma lometheswacala njalo kazange alume ngitsho ulimi uhle nje wazivumela umlandu wakhe njalo bekukhanya engagqize qhakala ngobubi bezenzo zakhe.
“Saqalisa ukudlala lumdlalo ngelanga sidlala umacatshelana labangane bami. Omunye ngaqala ukudlala laye umdlalo lo eminyakeni emithathu edluleyo, ayisikho ukuthi ngiyabe ngibabamba ngamandla ngoba labo ngiyabapha ithuba ngoba kuyabe kuyisivumelwano.
“Abanye sidlala e-park khonapha eLuveve Old noma bengavumanga. Lakhathesi lokhu silokhu siwudlala umdlalo lo.
“Sengake ngahamba emthethwandaba kanye ngihanjiswa ngumdlalo wami lo kodwa kuyala ukuthi ngiwuyekele njalo abangane bami abane ngahle ngayekela ukudlala labo ngelanga sivela emthethwandaba ngoba amapholisa angalisa ukuthi ngidlale labo,” kutsho umfana lo.
Ebuzwa ngale indaba uMqondisi wezemfundo esabelweni sakoBulawayo uMnumzana Dan Moyo uchaze ukuthi indaba le kakayizwa.
“Indaba le kangikayizwa kodwa ngilethemba lokuthi izafika kithi njalo sizayihlolisisa ukuze siphume leqiniso,” kuphetha uMnu Moyo.
Ukhansila wakulelilokitshi uMnumzana Thabani Moyo uthe useke wayizwa lindaba njalo uke wakhuluma lomphathi weLuveve Primary wabikelwa ukuthi indaba le isezandleni zamapholisa.
