uMthunywa
Cornelius Luphahla
ZIBABAZA zingaqedi izakhamizi zesigabeni seZidulini eTsholotsho ngemva kokuba esinye isalukazi sakule indawo esabanjwa sigcine isandla somntwana sithi ngesokuziqinisa sibuye njalo sakhitshelwa ondofa ababili sathi basincedisa ukugudula izindlu komakhelwane.
Isenzo lesi senzakale kuviki ephelileyo lapho uNkosazana Nomalanga Nkomo okhitshelwe khona ondofa ababili ngotsikamutanda ethi ubasebenzisa ukubagudulisa izindlu ezakhamizini zakule indawo ngenhloso yokuthola imali, uMthunywa uyakuveza lokhu namhlanje.
Kuzwakale ukuthi uNkszn Nkomo uyaziwa kakhulu esigabeni ukuthi uyakwazi ukugudula yikho okudala ukuthi izakhamizi zakule indawo zikholwe ukuthi ugudulelisa ondofa.
UMthunywa ukhulumisane loNkosazana Anna Sithole uyisakhamuzi sakule indawo wathi wayekhona mhla kusenzakala indaba le wabuya walandisa ukuthi kwahamba njani.
“Kwathi ngemva kokuba uNkszn Nkomo ekhitshelwe isandla somzukulu wakhe otsikamutanda laba bathi kunengi abazakukhipha kuye sathi mhlawumbe bayadlala. Okwangimangalisayo yikuthi ngemva kwenyanga baphenduka njalo bafika bamtshela ukuthi ulabondofa ababili.
“Bathe bembuza ukuthi ubasebenzisani wathi ubasebenzisa ukubagudulisa izindlu zabomakhelwane bakhe abamqatshayo ukuthi ezobagudulela. Wabuya wathi bayamncedisa njalo ukulungisa amakhabothi emkulu njengoba eziphilisa ngakho. Ngemva kwalokho abaphurofethi laba babatshisa ondofa bakhe,” kutsho uNkszn Sithole.
UMnu Mathe ongumntakaNkszn Nkomo uthe yena kakungeni okwendaba kanina ngoba ulomuzi wakhe.
“Mina ngeke ngikhulume ngendaba kamama ngoba sengilomuzi wami ngakho okwenzakala emzini wakhe kangikukhangeli njalo kayisikho kwami,” kutsho uMnu Mathe.
Ebuzwa ngale indaba uNkszn Nkomo uvumile ukuthi yenzakala wathi ondofa laba wabatshiyelwa ngunina wangamtsheli ukuthi ngondofa.
“Kuliqiniso ukuthi bangikhuphela ondofa ababili emzini wami kodwa izinto lezi ngazitshiyelwa ngumama wami ngesikhathi ebhubha njalo ngangingakwazi ukuthi ngondofa. Ngokunjalo okunengi ngeke ngikubalise ngendaba le ngoba kangazi lutho lami njengomuntu owatshiyelwayo,” kuphetha uNkszn Nkomo.
