uMthunywa
BALUTSHWANA abazinikela ukuthi baziphilise ngokuba ngabalobi bemidlalo kunye lendatshana. Kuliviki hlangana labasunguli be-Early entertainment abayibo ababhala bomdlalo othethe abantu ngodumo ngempelaviki uVoices in my head. Okulandelayo yingxoxo phakathi kukaSamkelo Tshuma loMhle Nzima u co-producer walumdlalo kunye lo Elliot Moyo.
Silandisele ukuthi lingobani njalo lahlangana njani?
EM: Ibizo nginguElliot Moyo lo nguMhle Nzima sisebenze sonke ku-Early entertainment, njalo senelisa ukubhala umdlalo othi ‘‘Voices in my head’. Sobabili sakhulela koBulawayo safunda ezikolo ezitshiyeneyo. Sahlangana ngomnyaka ophelileyo ku-Music Academy uMhle ebukisa ibhayisikopo yakhe ethi Moonlight Cross.
Akuthi fahlafahla ngembali yakho njengomlobi.
EM: Ngaqala ukuloba ngisesemncane, ngiloba indatshana ezimfitshane. Ngathi ngiqeda izinga laphezulu esikolo ngaloba eminye imidlalo ngayihambisa emasontweni atshiyeneyo ngesikhathi sekhefu. Ngithe ngiqeda isikolo ngo2011 ngasebenza leMsitheli sincedisana Aukuloba imidlalo yomcimbi we-Intwasa.
Idume ngani i-Early Entertainment
EM: I-Early entertainment ikhangela yonke nje imihlobo yezinto zokujabulisa uzulu, sikhangela ukuloba imidlalo, indatshana kunye lezomculo.
Usuke wathola isicoco kumbe umvuzo ngokuloba imidlalo kumbe indatshana?
EM: Yebo sesike sathola umvuzo ngokuloba indatshana, kulesikhathi lapho uhlelo lwe-Her Zimbabwe olwakhuthaza abalobi ukuthi bahambise indatshana zabo besebezakhetha ezine kulezo. Babefuna ezine thina sathola umvuzo ngoba kundatshana ezakhethwayo ezimbili zazilotshwe yimi lo-Mhle.
Elliot kuyini okwakwenza waba lomfutho wokuloba umdlalo i-Voices in my head, kwakusenzakalani empilweni yakho?
EM: Abantu nje engiphila labo yibo abangenza ngananzelela ukuthi kulendingeko yokuthi ngilobe lumdlalo ngoba nginanzelela ukuthi ubudlelwano babantu abanengi buyaphela ngoba umuntu uyabe elezinto ezimhluphayo phakathi osekumenza acine engasathembi muntu. Ngakubona kungumlandu ukuthi ngikhiphe le indikimba ngendlela ethokozisayo kodwa ilesifundo esimqoka.
Abantu bawuthakazelela yini lumdlalo ngempelaviki?
EM: Abantu bawuthanda umdlalo wethu, inengi elaphuzayo labuyela emuva ngoba indawo esasiyikhethile isigcwele bengaseneli phakathi abantu. Sizaphinda siwenze lumdlalo maduzane ngoba abantu bafuna siphinde umphehlo.
Umnyaka uthe uqala ubukhangelele ukwenzani? Kuyini owenelise ukukwenza njengoba umnyaka ususiyaphela?
EM: Sithe siqala umnyaka sizitshele ukuba sifuna ukuqhuba umsebenzi wethu ngendlela eqondileyo lokuthi sifuna ukuguqula indlela abantu abakhangela ngayo abalingiswa. Inengi labantu likholwa ukuthi abalingiswa bayadubeka. Lonyaka senelise ukukhipha umdlalo othandwe ngabantu abanengi bakoBulawayo, saloba indatshana ezimbili ezithole umvuzo ku-Her Zimbabwe njalo senza lomcimbi obudibanise abahlabeleli.
Njengoba indatshana elizilobayo kukhanya sengathi zamukelwa ngezandla ezimhlophe nguzulu kungani lingalobi ugwalo?
EM: Okusivimbayo kakhulu yikuswela imali eyeneleyo ukuthi silobe ugwalo luhle ludindwe, asifuni ukuloba ugwalo esizaphinda silugcine lungadindwanga.
Kuyini okulandelayo ngemva kwalumdlalo?
EM: Sizimisele ukubhala ezinye indatshana, imidlalo kanye lokungena kundima yezomculo.
Seluleko bani ongasipha abaqalayo ukuhamba indlela eliyikhethileyo.
EM: Engingakutsho yikuthi bangakhali, bangatshintshi amaphupho abo ngenxa yokuthi lokho abakufisayo kukhanya sengathi kuthatha isikhathi ukufezeka.
