uMthunywa
Ethel Ncube
KULEPHOLISA lakoBhinisi elitshiye izakhamizi zakule indawo zibambe owangaphansi ngemva kokujwamula isikhwama semali edilini andubana lizame ukubaleka layo.
Constable Tembo olipholisa enkambeni yeNyamandlovu ongatholakalanga igama lakhe ubanjwe etshontsha imali engange$29 ngempelaviki edlulileyo.
UMthunywa ukhulumisane lababekhona ngesikhathi umetheswacala uTembo ethatha isikhwama semali.
UNkosikazi Elizabeth Moyo uchaze ukuthi okwenziwa lipholisa leli kulehlisa isithunzi ngoba kumele kube yilo elenza abantu balandele umthetho.
“Sasimile egedini abantu bebhadala amadola okungena yena ezimele eceleni kanti ukhangele lapho okungena khona imali.
“Abanye belokhe besalibele uTembo wabhoda ngemva kukamama owayebhadalisa wajwamula isikhwama imali wathi nyawo ngibeletha laso,” kutsho uNkszn Moyo.
Uqhubekele phambili eveza ukuthi okwabamangalisayo yikuthi wayesithathelani njalo efuna ukusisa ngaphi.
“Abantu bamhlala izithende bambamba engakafiki khatshana njalo esikhwameni leso kwakule-$29 kodwa kazange avume wala lanxa waze wavuma esesenkambeni yamapholisa,” kutsho uNkszn Moyo.
Libuzwa ukuthi kungani litshontshile ipholisa leli lilume ulimi.
Intatheli ixhumane lomunye umfakazi owabona ipholisa lijwamula isikhwama uMnumzana Nkosiyethu Ndlovu osole kakhulu ubusela bepholisa leli.
“Umbuzo engilawo yikuthi ipholisa leli lingathola umuntu esona uzavuma yini ukubotshwa lipholisa leli lalo lilisela na?
“Yindaba kungavulwanga idokhethi wahanjiswa emthethwandaba wayaphiwa isigwebo ngoba wephule umthetho. Amapholisa abikelwa ukuthi omunye wabo utshontshile kodwa bakutshaya indiva kwaphelela emoyeni,” kubika uMnu Ndlovu.
Iphephandaba likazulu libikelwe ukuthi umsolwa ubenganxuswanga edilini leli .
Ekhuluma loMthunywa uNkosazana Thembelani Ncube onguye umnikazi wemali uveze ukuthi kalankani ngesenzo sepholisa leli.
“Thina sasiphakathi endlini silungisa ukudla umama wabuya ehlaba umkhosi ukuthi imali yonke isitshontshiwe lesikhwama kabonanga umuntu ojwamulileyo.
“Sithe silokhe sisadingisisa thutshu ipholisa liqhutshwa ngabantu lesikhwama besithi ubesebaleka laso,” kutsho uNkszn Ncube.
Ubuye waveza ukuthi imali bahle bayibala yonke lepholisa likhona balibikela ukuthi kuleyinye engekhoyo esilelayo.
“Sahle samtshela ukuthi ayenelanga wathi yena kakwazi ukuthi eyinye iyengaphi. Ngahamba enkambeni ngabona uSergeant Dube ngamtshela ukuthi ipholisa lingitshontshele imali balibiza lalandula icala kodwa ngasengisithi nxa kunjalo akuyiwe emthethwandaba lahle laxolisa lathi lizabhadala,” kutsho uNkszn Ncube.
Imizamo yokukhulumisana lepholisa leli yehlule ngoba ucingo lungangeni.
