uMthunywa
YiNtatheli kaMthunywa
ZIMADOLO nzima izakhamizi zesigabeni sakoSigola empumalanga yedolobho lakoBulawayo ngemva kokuba esinye isakhamuzi sakule indawo sibanjwe xhaka sifuye ingwenya elekhanda lomuntu kanye lezandla ebisihluphile esigabeni ngokulala labesifazana ebusuku.
Isiga lesi senzakale kuviki ephelileyo lapho uMnumzana John Nkomo obanjwe khona ngabaphurofethi efuye inkalakatha yengwenya elekhanda lomuntu kanye lezandla ngaphansi kombheda okubikwa ibisebenza ukumnothisa ngokumdingela imali ezitolo, njalo ilala labafazi babantu, uMthunywa uyakuveza lokhu lamhlanje.
UMthunywa uxhumane lesinye isakhamuzi sakule indawo uNkosazana Samukelo Moyo wachaza ukuthi kalankani ngenyamazana eyakhitshwa emzini kaNkomo.
“Lokhe ngathwetshulwa yingwe kangizake ngiyibone inyamazana enjeya. Ngilapha nje kangilankani ngoNkomo olamandla okufuya inyamazana esabeka njengaleya endlini. Inyamazana le uNkomo kuthiwa yiyo eyayimdingela ukudla kanye lemali yikho nje kwathi mhla ithathwa wathi bamncedile ngoba ubesethwele nzima ngayo ibingasasebenzi kuhle.
“Ekumhlupheni lapha kukhanya yiyo ebimenza ahlale egula kanye lemuli yakhe njalo ibisimbulalela lezifuyo zakhe,” kutsho uNkszn Moyo.
UNkszn Moyo uqhubekele phambili njalo waveza ukuthi lokhe kukhitshwe inyamazana le sebephumulile ukuphupha belele lowesilisa.
“Mina kade ngithwele nzima ngokuhlala ngiphupha ngilele lendoda kodwa kuthe ngemva kokukhitshwa kwenyamazana le kangikaze ngiphinde ngiphuphe lokhu.
“Ngikhuluma nje bonke omama ababehlala bekhuluma ngokuphupha belele lamadoda khathesi bathi akusabenzi lokhu okuchaza ukuthi yiyo inyamazana le ebisihlupha,” kuveza uNkzn Moyo.
UMnumzana Cephas Mlotshwa ubikele intatheli ukuthi uyajabula kakhulu ngokukhitshwa kwenyamazana le koNkomo ngoba besebethwele nzima ngokuphelelwa yikudla mahlayana.
“Abaphurofethi laba bayasebenza sibili ngoba kade sithwele nzima ngokuhlala sithenga ukudla sithengela inyamazana le ukuthi iyenika umnikazi. Ngikhuluma nje lokhu ikhitshiweyo inyamazana le sesiphumula ngoba singathenga impuphu iyahlala isikhathi kulalaphana ebesisidla i10kg amalanga amabili kuphela,” kuchaza uMnu Mlotshwa.
Ebuzwa ngale indaba uMnumzana John Nkomo uvumile ukuthi inyamazana le yakhitshwa emzini wakhe.
“Kuliqiniso sibili ukuthi kulenyamazana eyakhitshwa emzini wami eyayingacaci ukuthi yinyamazana bani. Inyamazana le abaphurofethi bathwala nzima ukuze bayibambe ngoba yayisilwa kakhulu baze bayigwaza ngomkhonto sisalela ngaphansi kombheda endlini yami.
“Noma nje inyamazana le yaphuma emzini wami kodwa mina kangiyazi kuthiwa yagciniswa ngezinye izakhamizi ezaziyisebenzisa ukunotha ngayo.
“Ukuthi besihlala sigula kuliqiniso sibili kodwa khathesi mina sengisizwa ngcono lokhe bayikhuphayo inyamazana le. Ngalokhu ngiyababonga kakhulu abaphurofethi laba ngoba bangisizile sibili,” kuphetha uMnu Nkomo.
