uMthunywa
Gladmore Ncube
BAQINISILE nxa besithi uthando alula migoqo nanko phela kulendoda esixabana lomfowabo isizatho siyikuthi ayifuni kwehlukaniswa lenjuzi yayo.
Indoda le ehlala koBulawayo elokitshini leCowdray Park ithi ithandana lenjuzi njalo ayisoze yavumela noma yini ukuthi ingene phakathi kothando lwabo.
UMnumzana Reuben Marlon Magondo ubikele uMthunywa ukuthi uthandana lenjuzi kodwa into esimhlupha ngumfowabo uJustin Magondo ofuna ukubehlukanisa.
“Mina ngithandana lenjuzi njalo izinto zami zingihambela kuhle kakhulu nxa ngilayo. Okungihlukuluza kakhulu yikuthi umfowethu nxa ngimtshela ukuthi ngithandana lenjuzi ungibizela amapostoli athi bangibeke izandla ngoba ngiphambene.
“Umfowethu vele ulomona njalo uthanda nxa kunguye ngoba wathi ethatha isithembo yithi esamsekelayo kodwa khathesi sengijikela uyala ukuthi ngithandane lomaqondana wami uqina ngokuthi ngilemimoya,”kuchaza uMnu Magondo.
Ubuye wachaza njalo uMnu Magondo ukuthi injuzi yakhe uhlangana layo elwandle ebusuku.
“Injuzi le ingenzela kuhle kakhulu ngoba mina angikaze ngiye elwandle kodwa lokhe ngahlangana layo sengitshona khona emanzini olwandle. Mangilele ebusuku iyabuya ingithathe nginyamalale layo siyevumbuluka elwandle.
“Injuzi le ingithanda kakhulu ngoba ayivumi ukuthi ngithandane labanye abafazi ifuna mina ngedwa. Mina bengingumuntu othanda ukuba labesifazane abanengi kodwa lokhe ngahlangana lenjuzi yami ngingaze ngizame ukuthi ngiqomise phandle bayangala bonke,” kuchaza uMnu Magondo.
Kukhanya angathi uthando lolu luvutha amalangabi ngoba uze wachaza uMagondo ukuthi injuzi le ize yamtshintsha lenwele zakhe yamfaka ezerasta elwandle.
“Injuzi yami yangitshintsha inwele zami yangifananisa layo yathi ifuna ukungiphotha. Inwele zami lezi bengizithanda kakhulu njalo lesithandwa sami besizithanda ngokufanayo yikho nje umfowethu ethole isijeziso ngongikugela.
“Umfowethu aze athi ngigele inwele zami waphambanisa kakhulu ngoba injuzi yami yazonda okwamdalela ukuthi aze aqamuke unyawo. Injuzi yangitshela yathi izamjezisa ngokukhupha inwele zami. Ukujeziswa kwakhe kwaba yikuthi injuzi yenza isithembo sakhe simthelele simtshaye. Ekutshayweni kwakhwe waqamuka unyawo bemtshaya kodwa engenzanga lutho kodwa besetshenziswa yinjuzi,” kutsho uMnu Magondo.
UMthunywa ukhulumisane njalo losiyazi uMnu David Mhabhinyane oweZimbabwe Traditional Healers’ Association ubuzisisa ukuthi kuyenzeka yini ukuthi umuntu athandane lenjuzi. UMnu Mhabhinyane uthe yimimoya emibi enza umuntu athi uthandana lenjuzi.
“Sihlala vele sihlangana labantu abathi bona baphila lenjuzi kodwa lokhu yimimoya emibi bayabe bephutshiswa izinto ezimbi zamadimoni. Abantu abanje bayabe befuna ukukhulekiswa kumbe bahanjiswe ebantwini belatshwe belahliswe imimoya le emibi,” kuphetha UMnu Mhabhinyane.
