uMthunywa
YiNtatheli kaMthunywa
UMSEKELI kaMongameli welizwe uKembo Mohadi usenze isinqumo sokwehla esihlalweni sobukhokheli, ngenjongo yokulondoloza isithunzi sikaHulumende kulandela ukuphuma kwensolo zokuphatheka kubudlelwano obubi kunsuku ezedluleyo.
Isinqumo sokwehla esihlalweni ngoMvulo size kungakapheli iviki enze umhlangano lentathelizindaba eHarare lapho azibikela ukuba yimisebenzi yabantu abafuna ukumhlambalaza lokungcolisa igama lakhe njengomholi wezepolitiki elizweni ngokuveza izinsolo zokungaziphathi kahle. Lokhu kulandela ukusabalaliswa kunkundla zokuxhumana kokucatshangelwa ukuba yibudlelwano labesifazana ababili abatshadileyo.
Kusitatimende uMohadi wagcizelela ukuba umsulwa.
Uthe izitha zakhe zasebenzisa imthombo yezokuxhumana ukumngcolisa.
“Ngemva kokuphindaphindwa kokusabalaliswa kolwazi olungaqondanga kanye lokuqiniswa kwenkulumo zokuba kangiziphathanga kahle, sengitshiya isikhundla sokuba nguMsekeli kaMongameli welizwe leZimbabwe ngokutsho komthetho kaSection 96(2) wesisekelo sombuso welizwe leZimbabwe (No.20) Act, 2013 khathesi,” kutsho yena.
UMsekeli uMohadi uthe ngemva kokwenza “uhambo lokuhlola umphefumulo”, unanzelele ukuthi udinga ithuba lokubhekana lenkinga zakhe.
“Loba kunzima emulini, kubangane, kanye lamanye amakhomuredi ebandla leZanu PF, ngithatha isinqumo sokwehla esihlalweni sokuba nguMsekeli kaMongameli weZimbabwe, ukuze ngilondoloze isithunzi sobukhokheli bukaHulumende wami.
“Isinqumo sami sokutshiya isikhundla sokuba nguMsekeli kaMongameli yindlela yokuhlonipha izizalwane zelizwe leli elikhulu, kanye lamalunga ebandla, abanye abangabe bethintekile ngamanga la angcolisa isimilo kwezokuxhumana,” kutsho yena.
UMsekeli uMohadi uthe isinqumo sakhe sokutshiya isikhundla kayisibo bugwala kodwa yisitshengiselo sokuhlonipha okukhulu iwofisi kaMongameli ukuze “ingaphanjaniswa yizenzo ezihlobene lenhlupho zami njengomuntu.”
Uphethe ngokubonga uMongameli uMnangagwa, amalunga eZanu PF kanye lezizalwane zakuleli ngosekelo.
“Kuhambo lwami lwezepolitiki, ngifunde ukuthi akulabanqobi kumbe abehluleki kwezobukhokheli, kodwa singabahambi abaxhumene ngesigqoko sinye salapho esiyakhona,” kutsho yena.
“Ngifisela uMongameli weZimbabwe okuhle, nxa eqhubeka ethwele umthwalo wokuthuthukisa impilo zabantu beZimbabwe, ukujabula ethembeni kanye lekubekezeleni, osizini lokulwa lobumpofu, iCovid-19 kanye loMbono ka2030.”